Республикæ Хуссар Ирыстоны Президент Бибылты Анатоли схорзæхджын кодта Хетæгкаты Къостайы номыл Цæгат Ирыстоны паддзахадон университеты ирон филологийы факультеты ахуыргæнджыты факультеты 95 азы боны цытæн.
Мадзал уагъд æрцыд Дзæуджыхъæуы Цæгат Ирыстоны паддзахадон университеты.
«Махæн æнæрцæугæ нæ уыд ахæм нысаниуæгджын бæрæгбонмæ. Нæ мадæлон æвзагæн куы нæ кад кæнæм æмæ йæ нæ кæстæр фæлтæрæн куы нæ уарзын кæнæм, уæд нын сомбон дæр нæ уыдзæн. Не ‘взаг у нæ хæзна», – загъта Бибылты Анатоли.
Президент банысан кодта, ирон æвзаджы райрæзты фæдыл цы къамис арæзт æрцыд, уый сконды кæй сты Ирыстоны хуссар æмæ цæгат хайы ахуыргæндтæ æмæ уыдоны уæхсджытыл кæй ис стыр бæрндзинад.
«Къамис стыр куыст кæны æмæ ныфс æвæрæн ис, ирон æвзагæн ирд сомбон кæй уыдзæн», – загъта уый.
Хуссарирыстойнаг паддзахады сæргълæууæг ма банысан кодта, ирон æвзаг ахуыр кæныны стыр нысаниуæг кæй ис, сывæллон цы бинонты ‘хсæн хъомыл кæны,уымæн.
«Хистæр кары адæймæгтæ кæддæриддæр скъола æмæ ахуыргæнджыты аххосджын кæнынц, сæ сывæллæттæ кæй нæ зонынц ирон æвзаг. Фæлæ мæнмæ гæсгæ, фыццаджыдæр æвзаг ахуыр хъуамæ цæуа хæдзары», – банысан кодта Президент.
Уый фæстæ уыд хорзæхтæ дæттыны цытджын церемони. Бибылты Анатоли схорзæхджын кодта Республикæ Хуссар Ирыстоны паддзахадон хорзæхтæй Цæгат Ирыстоны паддзахадон университеты профессорон-ахуыргæнджыты сконды.
Уыимæ иумæ, Президент схорзæхджын кодта ирон филологийы факультетæн йæхи дæр Кады грамотæйæ «бæрзондквалификациджын кадртæ цæттæ кæныны хъуыддагмæ йе стыр хайбавæрды, ирзонынады райрæзты фадыджы активон куысты тыххæй æмæ йæ сырæзты 95 азы цытæн».
Comments are closed, but trackbacks and pingbacks are open.