21 октябры, РХИ-йы Президент Тыбылты Леонид йæхимæ æрбахуыдта æрæджы, йæ Барамындмæ гæсгæ Хетæгкаты Къостайы номыл паддазахадон премийы номинанттæ цы фондз адæймаджы систы, уыдоны æмæ Къостайы номыл премийы къамисы уæнгты.

Куыд зонæм, афтæмæй 12-æм октябры Хетæгкаты Къостайы номыл паддзахадон премийы фæдыл къамисы хъуыдымæ гæсгæ ирон литературæ, историон зонæдты, филологийы æмæ публицистикæйы къабазы стыр хисæрмагонд лæггæдты тыххæй Къостайы преми лæвæрд æрцыд: литературæйы къабазы — Плиты Гацыр Гаврилы фыртæн — чингуытæ «Ирон литературæйы истори» æмæ «Къостайы тыххæй». Историон зонæдты къабазы — Бигъуылаты Иринæ Степаны чызгæн — чиныг «Хетæгкаты Леуаны фырт Къоста: зонадон биографи»-йы тыххæй. Кокойты Теймураз Исахъы фыртæн — «Биологи æмæ медицинæйы фæдыл уырыссаг-ирон энциклопедион дзырдуат. Неологизмтæ æмæ терминты системæ»-йы тыххæй. Публицистикæйы къабазы — Тедеты Заирæ Константины чызгæн (проекты авторæн). Хъодалаты Хансиат Герсаны чызгæн — редактор — журнал «Русское слово в Южной Осетии»-йы рауадзыны тыххæй.

Паддзахадон премийы лауреаттыл Президент фембæлд националон дарæсы.

Уæ зæрдыл уын лæууын кæнæм, Къостайы преми нæ республикæйы лæвæрд кæй цæуы 2 азы иу хатт. Хетæгкаты Къостайы гуырæнбоны цытæн.

Къостайы преми цы лауреаттæн лæвæрд æрцыд, уыдонæн Президент раарфæ кодта цытджын æгъдауæй æмæ сын сæ риуыл бакодта риуылдарæн нысæнттæ. Сфидаргонд фæткмæ гæсгæ лауреаттæн лæвæрд æрцыд æхцайы фæрæзтæ дæр, кæцытæ æмхуызонæй дих æрцыдысты авторты ‘хсæн.

Президент лауреаттæн загъта: «Уæ куыст æмæ архайды тыххæй зонынц бирæ адæм. Нæй абон Ирыстоны Хетæгкаты Къостайы премийæ кадджындæр. Фæстаг дыууæ азы сымах уæ тыхтыл æнæауæрдгæйæ архайдтат, цæмæй ацы стыр премийы лауреаттæ суат, æмæ мæнæ ныр уæ къухы бафтыд стыр æнтыст. Арфæ уын кæнын æмæ уын ноджы стырдæр æнтыстытæ уæд уæ куысты. Мæнæн æхсызгон у ахæм стыр мисси мæнмæ кæй æрхауд, уый», — дзырдта Тыбылты Леонид.

Номинанттæй сæ иу, Кокойты Теймураз фæндон бахаста, цæмæй Цхинвалы арæзт æрцæуа Кады фæйнæг, цыран фыст æрцæуа литературæ, историон зонæдты, филологийы æмæ публицистикæйы къабазы стыр хисæрмагонд лæггæдтæ кæмæн ис йæ адæмы раз, уыдон номхыгъд. «Фыццаг рады уыдон сты Джыгкайты Шамил, Гобозты Валери æмæ æндæртæ», — загъта Кокойты Теймураз. Уый ма куыд загъта, афтæмæй уый цæттæ у йæ премийы æмбис ахынцын ацы план реализаци кæныны тыххæй радтынмæ.

Ацы хъуыды фæцыд Президент æмæ къамисы уæнгты зæрдæмæ. Тыбылты Леонид загъта, ацы фарст сахуыр кæнын кæй хъæуы.

Къамисы уæнг Битарты Зоя фæндон бахаста, цæмæй Къостайы премийы æмрæнхъ конд æрцæуа Абайты Васойы преми дæр. Къостайы премийы дæттыны рæстæджы лæвæрд не ‘рцыд аивады къабазы иунæг преми дæр. Æз, сæрмагондæй мæхæдæг хъæлæс кодтон документалон фильм «Осетинская Вандея»-йæн, кæцы арæзт æрцыд ирон адæмы геноцидыл. Разы дæн, ацы фильм бирæ цæмæйдæрты баххæсткæнинаг кæй уыд, фæлæ уый фыццаг къахдзæф кæй у, уый тыххæй у раппæлинаг. Ноджы ма уын иу хатт уæ зæрдыл лæууын кæнын, æнæмæнг кæй хъæуы сфидар кæнын Абайты Васойы преми.

Президенты зæрдæмæ фæцыд Битарты Зояйы хъуыды, æмæ ныфс бавæрдта, уыцы фарстыл сæрмагонд куыст кæй æрцæудзæнис.

Республикæ Хуссар Ирыстоны Президенты цур Хетæгкаты Къостайы номыл паддзахадон премийы къамисы сæрдар Джиоты Мурат цыбыртæй радзырдта, къамис цы ахсджиаг куыст бакодта кандидаттæ раразмæ кæныны рæстæджы, ууыл. Премийы уагæвæрд карзæй хъахъхъæд кæй цыд, уымæ гæсгæ иуæй-иу кандидатты куыстытæн аргъ не ‘рцыд. Мæн фæнды, цæмæй уыцы автортæ радон хатмæ сæхи бацæттæ кæной хуыздæр. Уый ма раарфæ кодта канд номинанттæн нæ, фæлæ къамисы уæнгтæн дæр.

Рабадты кæрон Президент баныфс æвæрдта, абон цы фæндтæ райхъуыст, уыдон æнæхъусдардæй кæй нæ баззайдзысты.

Уазæгты Марфа

Comments are closed, but trackbacks and pingbacks are open.