Ацы бонты фæсивæдон организаци «Иууон Алани»-йы активисттæ 20 адæймаджы скондæй, сæ сæргъ организацийы лидер Коцты Михаил, афтæмæй хайад райстой Æхсæнадæмон фæсивæдон форум «Каспий-2018»-ы, кæцы уагъд цыдис Дагъыстаны. Форумы сæ хайадисты æмæ сæ тæлмæнты тыххæй Коцты Михаил, Карсанты Дзамболат æмæ Бекъойты Филипп радзырдтой, Информаци æмæ мыхуыры паддзахадон комитеты пресс-центры цы брифинг ауагъд æрцыд, уым.
Йæ раныхасы Коцты Михаил куыд загъта, афтæмæй сæ форуммæ фæхуыдта Дагъыстаны фæсивæдон организаци. Уыимæ æмгуыстад кæнынц ныр 10 азы бæрц. Йæ ныхæстæм гæсгæ сæ райстой тынг хорз, сæмбæлдысты сыл ирон кæфтытимæ. «Æз хайад истон дискусситы, цыран дзырдтон нæ адæмы царды, йе ‘гъдæуттæ æмæ традициты тыххæй. Форумы фæлгæтты мах фембæлдыстæм Дагъыстаны фæсивæдон политикæйы министримæ, цыран мах æрдзырдтам нæ иумиаг хъуыддæгты æмæ нæ фидæны плæнтты тыххæй. Фембæлды рæс-тæджы ма мах бадзырдтам, цæмæй форум «Каспий-19»-ы хайад исой нæ фæсивæд дæр», – загъта Михаил.
«Иууон Алани»-йы уæнгтæ ма радзырдтой, Дагъыстаны фæсивæды минæвæрттимæ сын кæй уыд цымыдисон фембæлдтытæ æмæ сын фо-рум ирд тæлмæнтæ кæй ныууагъта сæ зæрдæты.
Дарддæр «Иууон Алани»-йы активисттæ радзырдтой, экскурсийы сæ кæй акодтой æмæ сын кæй фенын кодтой Дагъыстаны фенддагдæр бынæттæ – Чиркейскы гидроэлектростанцы, Сулакскы каньон, бархан «Сары-Кум»-ы, Дербент æмæ «Нарын-Кала»-йы фидары. Республикæйы сæйраг горæты уыдонæн фадат уыд музей «Россия – моя история»-мæ бацæуын æмæ музейы сырæзты историимæ базонгæ уæвынæн. Фадат сын уыд Каспы денджызы был баулæфынæн дæр.
Иудзырдæй, тынг райгондæй кæй æрыздæхтысты «Иууон Алани»-йы уæнгтæ, уый бæрæг уыд сæ раныхæстæй.
«Ахæм æхцондзинад кæй райстой форумы хайадисджытæ, уый у Президент Бибылты Анатолийы иузæрдион æххуысы ‘руаджы. Йе ‘ххуыс ын, мах æнкъарæм æдзухæй. Йæ бæллиц у, цæмæй нæ фæсивæд размæ цæуой, æнтыстджын уой. Æмæ йын ахæм аудындзинады тыххæй зæгъæм стыр бузныг», – загъта Коцты Михаил.
Йæ цины æнкъарæнты тыххæй брифингмæ æрбацæуджытæн радзырдта Карсанты Дзамболат дæр. Уый дисы бафтыдта Дагъыстан йæ рæсугъддзинадæй.
«Ацы фембæлд мæныл бандæвта хорзæрдæм. Иуæй форумы райстам активон хайад, иннæмæй та нæм ахæм хæлар ахаст кæй равдыстой, уый ныл базыртæ асагъта, зæрдæ йæхи арвы милтыл асæрфта», – дзырдта райзæрдæйæ Дзамболат.
Йæ ныхасы кæрон бузныджы ныхæстæ загъта Бибылты Анатолийæн, растдæр йæ хъæп-пæрисон архайды ‘руаджы кæй ис æнтыстытæ нæ фæсивæдæн, уый тыххæй.
Карсанты Дзамболат ма бузныг загъта «Иууон Алани»-йы къухдариуæггæнæг Коцты Михаилæн дæр, кæцы йæ архайдæй цæвиттойнаг у фæсивæдæн.
Бестауты Валя
Comments are closed, but trackbacks and pingbacks are open.