Нæ адæм хъæлдзæг зæрдæйы равгимæ фæнысан кæнынц, Уæрæсе Хуссар Ирыстоны хæдбардзинад куы банымадта, уыцы кадджын бон. Афтæ та уыд æрæджы Цхинвалы районы Къостайыхъæуы цæрджытæн дæр. Куыд æрвылаз, афтæ та ныр дæр бæрæгбонмæ йæхи хорз бацæттæ кодта хъæууон культурæйы хæдзар (директор Мамиты Дзерассæ). Райдианы бæрæгбонмæ æрбацæуджыты раз раныхас кодтой Цхинвалы районы администрацийы сæргълæууæг Бæззаты Инал æмæ хæдархайгæ аивадон коллективы разамонæг Куыдзеты Янæ. Æрдзырдтой хæсты уæззау азтыл, нæ хъæбатыр адæм сæ ныхмæ цы удуæлдай тох кодтой, уыдон æмæ Уæрæсейы фæрцы абон сабыр арвы бын кæй цæрæм. Уæдмæ райхъуыстысты ирон фæндыры зæрдæхцон зæлтæ æмæ кафджыты къорды уæнгтæ сæххæст кодтой «Зилгæ кафт». Уый фæстæ ма уыдон акафыдысты æмæ сценæмæкæсджыты сæ аив ралæудæй барухс кодтой ахæм кæфтытæй, куыд «Хонгæ кафт», «Чызджыты кафт» æмæ «Хæххон кафт». Уымæй дарддæр ма райгуырæн бæстæ, Ирыстон æмæ хистæртыл фыст зарджытæ «Фыдыбæстæ», «Ирыстон», «Нæ буц хистæртæ» æмæ æндæртæ аив сæххæст кодтой Хуыбиаты Аслан, Марат æмæ æндæртæ. Сценæйыл ма сæ аив ралæудæй адæмы зæрдæтæ барухс кодтой Гæбæраты Сослан, Тараты Аннæ, Хуыбиаты Миленæ, Аделинæ, Джиоты Азæмæт, Наниты Марат æмæ æндæртæ. Бæрæгбонон мадзалмæ æрбацыд бирæ адæм æмæ сæ чысыл артистты алы ралæудæй дæр баззадысты райгондæй.
ХУЫБИАТЫ Никъала
