Горæт Цхинвалы Æлборты Феликсы номыл музыкалон ахуыргæнæндоны уагъд æрцыд классикон музыкæйы цымыдисон концерт, кæцы баст уыд Республикæ Хуссар Ирыстоны хæдбардзинадыл банымайыныл 10 азы сæххæсты бонимæ. Концертмæ æрбацыдысты РХИ-йы Президент Бибылты Анатоли, Хицауады Сæрдар Пухаты Эрик, Ахуырад æмæ зонады министр Гасситы Натали, Культу-рæйы министр Зассеты Жаннæ æмæ бирæ æндæр уазджытæ.
Бæрæгбонон изæр райдыдта Цхинвалы паддзахадон музыкалон ахуыргæнæндоны хоры зардæй, сгуыхт ахуыргæнæг Хъуылымбегты Иринæйы сæргълæудæй. Сæ арæхстдзинад равдыстой солисттæ Гасситы Ацæмæз, Сланты Ацæмæз, Хъуылымбегты Луизæ, Гатыгкоты Нинæ, ахуыргæнæндоны ахуыргæнинæгтæ.
Республикæйы къухдариуæгады æмæ йæхи номæй Паддзахады сæргълæууæг стыр бузныг загъта музыкалон ахуыргæнæндоны коллективæн, сæрмагондæй та йæ директор Гæджиты Жаннæйæн ахæм рæсугъд музыкалон изæр кæй бацæттæ кодтой, уый тыххæй. Йæ цæст сын бауарзта дарддæры сфæлдыстадон æнтыстытæ.
«Музыкалон ахуыргæнæндоны коллектив та нын радон хатт нæ зæрдæтæ бахъæлдзæг кодта. Мах байхъуыстам музыкæйы диссаджы зæлтæм, кæцытæ нын балæвар кодтой Хуссар Ирыстоны музыкалон элитæйы минæвæрттæ. Арфæ уын кæнын, цæмæй нын алы бон дæр уа бæрæгбон нæ хорз хъуыддæгтæй», – банысан кодта бæстæйы сæргълæууæг.
Уый ма æрæмбырдуæвджытæн раарфæ кодта Сыгъдæг Никъалайы боны цытæн æмæ сын йæ цæст бауарзта æнæниздзинад æмæ дарддæры рæзты фæндиæгтæ. «Хуыцау зæгъæт æмæ Сыгъдæг Никъала не ‘ппæты дæр хъахъхъæнæт, æххуыс кæнæт нæ Ирыстонæн», – загъта Президент.
Йæ рады ахуыргæнæндоны директор Гæджиты Жаннæ дæр бузныджы ныхæстæ загъта йæ коллективæн сæ куыстуарзондзинад æмæ хъарм ахасты тыххæй. «Мах алы хатт дæр цæттæ стæм адæмæн музыкæйы рæсугъд зæлтæ балæвар кæнынмæ, Фыдыбæстæ æмæ Ирыстоны сæрвæлтау аивадæн лæггад кæнынмæ», – загъта Гæджиты Жаннæ.
Нæ уацх.
Comments are closed, but trackbacks and pingbacks are open.