Ацы бонты Хуссар Ирыстонмæ кусæгон балцы æрцыдысты Женевæйы дунеон дискусситы æмсæрдæрттæ Евроцæдисæй, ЕÆÆО-йæ æмæ ИНО-йæ. Балцы нысан уыд, дискусситы радон раунды боны фæткы фарстатыл æруынаффæ кæнын. Дунеон дискусситы минæвæрттæ фембæлдысты хуссарирыстойнаг делегацийы уæнгтимæ. Фембæлд уагъта Президенты паддзахадон уынаффæгæнæг Коцты Константин. Хуссар Ирыстонæй дзы хайад райстой Фæсконфликтон фарстатæ æрбæстон кæныны фæдыл РХИ-йы Президенты æххæстбарджын минæвары хæдивæг Коцты Егор æмæ Адæймаджы бартæ хъахъхъæныны фæдыл Президенты цур Æххæстбарджын минæвар Тасойты Инал.
Паддзахадон уынаффæгæнæг Коцты Константины ныхæстæм гæсгæ ацы аз кæдæй-уæдæй уагъд æрцæудзæн фыццаг фембæлд Женевæйы. Мартъы мæйы æмæ уый фæстæ та июны мæйы пълангонд фембæлдтытæ ацы æнæхайыры коронавирусы пандеми рапарахаты, аххосæй уагъд не рцыдысты. Афтæ уыд ивгъуыд азы дæр.
«Куыд зонæм, афтæмæй Фæскавказы регионы уавæр дæр нæу стабилон, уый æндавы женевæйаг процессыл дæр. Æвдисæн стæм бæрæг негативон хъуыддагæн дæр – сæрмагондæй, Гуырдзыстоны масштабон æфсæддон ахуыртæ уагъд кæй цæуы. Фæсарæйнаг политикон архайджытæ, архайæг æмæ фæсауæрцы æфсæддон службæгæнджытæ сидынц Уæрæсейы ныхмæ дыккаг фронт бакæнынмæ.
Фæлæ мах ныфс ис, æмæ Гуырдзыстон сæхи кæй равдисдзысты зондджынæй, цæмæй ацы провокацитæм ма хъусой», – банысан кодта ныхасгæнæг.
Уыцы æфсæддон ахуырты хайад исынц Кавказы регионтæй мингай километрæй дарддæр уæвæг бæстæтæ.
«Цы хуызы цымæ Японы паддзахад йæ паддзахаддзинад фидардæр кæны, се ‘фсад Кавказмæ æрвыстæй? – уыцы фарст лæвæрд цæуы æндæр бæстæтæм дæр, кæцытæ хайад исынц уыцы ахуырты», – дзырдта Президенты уынаффæгæнæг.
Йæ ныхæстæм гæсгæ бадзырдон фæзуаты хъуыддаджы Женевæйы дискусситæн альтернативæ нæй, уым дзырд фæцæуы æдасдзинады фарстатыл æмæ бадзырдтыты сæйраг æмæ абоны онг дæр ахсджиаг фарст чи у, уыцы юридикон бæрнджын документыл къухтæ бафыссын – Хуссар Ирыстоны ныхмæ Гуырдзыстон тыхæй пайда кæй никуыуал кæндзæн.
Уый ма банысан кодта Инциденттæ ма æруадзын æмæ сæм хъусдард здахыны фæдыл механизмты форматы егъау нысаниуæг, кæцыйы куыст нæ æрнымæг, Женевæйы фембæлдтыты формат кæд къуыхцы кæны, уæддæр. Фæлæ уæддæр Механизмты фæлгæтты куыст нæ баивдзæн пленарон форматы æххæстбæрцон куыст. Уымæ гæсгæ форматы фембæлдтытæ уадзын хъæуы.
Коцты Константин банысан кодта, зæгъгæ, нымайæм афтæ æмæ æдасдзинад фидар кæнын у женевæйаг процессы хайадисджытæй алкæмæн дæр йæ фыццаградон æмæ сæйраг хæстæй сæ иу. Мах не ‘ппæтдæр хъуамæ тырнæм ацы процессы дарддæры фæстиуæгджын æмæ æнтыстджын куыстмæ.
ЕÆÆО-йæ æмсæрдар ныфс бавæрдта фембæлынæй
ЕÆÆО-йæ æмсæрдар Виорел Мошану куыд банысан кодта, уымæ гæсгæ традицион æгъдауæй консультацитæ уагъд фæцæуы женевæйаг процессы хайадисджытимæ. Уымæй размæ æнгæс фембæлд уагъд æрцыд Тбилисы, Хуссар Ирыстоны фæстæ та дискусситы æмсæрдæрттæн фембæлд уагъд æрцæудзæн Сухумы, уый фæстæ та Мæскуыйы. Куыд, зæгъгæ, æмсæрдæрттæ æмæ организациты минæвæрттæ, афтæ иузæрдион стæм женевæйаг процессыл.
«Уымæн активонæй иу кæнæм хисæрмагонд фембæлдтытæм, уадзæм онлайн-консультацитæ æмæ нæ ныфс ис, 5 октябры нын фадат кæй фæзындзæн кæрæдзи Женевæйы фенынæн», – банысан кодта ныхасгæнæг.
Дискусситæ сæ райдианæй фæстæмæ сты дыууæ фарсы, кæнæ хайадисджыты æхсæн сабырадон æмæ конструктивон диалог саразынæн.
Зонæм, зæгъгæ, ивгъуыд рæстæджы вазыгджын уавæртæ, фæлæ уæддæр размæ кæндзыстæм бадзырдтытæ сабырад æмæ регионы стабилондзинады фæдыл фарстатæ. Уымæ гæсгæ бахатыд дискусситы æмсæрдæрттæм, цæмæй активон хайад райсой гуманитарон фарстатæ, æдасдзинады фарстатæ æмæ уавæры тыххæй уынаффæ кæныны хъуыддаджы, цæмæй хорз фæстиуджытæ уа.
Йæ ныхæстæм гæсгæ дискусситы æмсæрдæрттæ аразынц æппæтдæр, цæмæй бахъахъхъæной хайадисджыты æхсæн бастдзинад æмæ сты хуссарирыстойнаг позицийы – Женевæйы процессы ахсджиагдзинады фарс. Виорел Мошануйы ныхæстæм гæсгæ уый дæр у Механизмты форматы архайд адарддæр кæныны фарс, «тæвд хаххæй» пайда кæнын, уымæн æмæ, зæгъгæ, уый у регионы стабилондзинад хъахъхъæныны сæйраг элемент.
«Хорз хъуыддаг у арæнты сæртыл хизыны пункттæ кæй байгом сты, уый. Уый у стыр къахдзæф размæ. Уымæн æмæ уыцы практикон къахдзæфтæ фæрог кæндзысты цæрджыты æрвылбонон цард – уый у иууыл хæрзвадатдæр, цæмæй дискусситæ уой продуктивон», – банысан кодта Мошану.
ИНО-йы æмсæрдар Джихан Султаноглу ныфс бавæрдта, зæгъгæ, иумæйаг тыхтæй махæн иумæ нæ къухты бафтдзæн Женевæйы дискусситæ цы нысанæн арæзт æрцыдысты, уый. Нæ тыхтæ æмæ хъарутæ зæгъгæ, нæ бавгъау кæндзыстæм цæмæй дискусситы радон раунд рæхджы уагъд æрцæуа.
Ныфс нæ ис, мах дæр 7 июны уагъд кæй æрцæудзæн фембæлд, æмæ ацы формат баззайдзæн ахсджиаг форматæй дискусситы архитектурæйы, кæцы, иумиагæй сисгæйæ, размæ кæны ахсджиаг нысан – тыхæй пайда кæй нал æрцæудзæн, уыцы сразыдзинад.
КЪÆБУЛТЫ Маринæ
Comments are closed, but trackbacks and pingbacks are open.