Æртыццæджы, 4-æм сентябры нæм Цæгат Ирыстонæй æрæхъуыст фыдохы хабар. Æнæнхъæлæджы 41 аздзыдæй ахуыссыд Быценты Геннадийы фырт Иналы стъалы. Хуссар Ирыстоны кафты аивадыл æрцыд уæззау зиан. РХИ-йы адæмон артист, Республикæ Абхазы сгуыхт артист уыд курдиатджын кафæг, Галаты Барисы номыл Зард æмæ кафты паддзахадон ансамбль «Симд»-ы раззагондæр солисттæй иу. Йæ ацыд æнæбаххæстгæнгæ зиан у национ культурæйæн. Бæрзонд æмвæзады профессионалæн йе ‘ппæт цард нывонд уыд аивадæн.
Быценты Иналы хъысмæт æнæаскъуыйгæйæ баст у ирон хореографион аивадимæ чысылæй фæстæмæ йæхи уымæн снывонд кодта. Йæ номимæ баст у падддзахадон ансамбль «Симд»-ы истори. Сценæмæкæсджыты уарзондæр артист йæ курдиатæй уыд цæвиттойнаг æвзонг артисттæн.
Быценты Инал райгуырд хореографты бинонты ‘хсæн æмæ скъолайы азты райдыдта кафын бæстæйы сæйраг ансамблы сконды. Чысыл Хуссар Ирыстон Иналы зыдтой æрмæст куыд зынгæ хореограф Быценты Геннадийы фырты нæ, фæлæ куыд диссаджы кафæджы, афтæ. Уый йæ арæхстдзинадæй уайтагъд бауарзын кодта йæхи сценæмæкæсджытæн.
«Нæ нырыккон хореографион аивад фæцух ис йæ бындурæй, йæ колоритæй. Уымæн æмбал нæ уыд куыд кафты дæсныйады, афтæ ма профессимæ бæрнон ахасты дæр. Инал ансамблимæ рацыд дæргъвæтин фæндагыл. Хæрзæвзонгæй райдыдта йæ карьерæ æмæ æнувыд уыд йæ хъуыддагыл, Хицæн кодта сценæйыл йæ алы фезмæлдæй дæр.
Быценты Инал ссис нырыккон паддзахадон ансамблы символтæй иу. Тынг зын уыдзæн коллективæн æнæ Иналæй. Цалдæр номыры, уыцы нымæцы абхазаг æмæ цæцæйнаг кафтытæ, афтæ ма уыдисхæххон æмæ алайнаг кафтыты солист. 2023 азы йын лæвæрд æрцыд Республикæ Хуссар Ирыстоны адæмон артисты ном. Уыцы аз ма йын саккаг кодтой Республикæ Абхазы сгуыхт артисты ном дæр. Æвзонг фæлтæры ориентир уыд йæ ирд æмæ хæдхуыз стилимæ темпераментон кафт», – банысан кодта РХИ-йы Культурæйы министр Зæгъойты Рада.
Ансамбль «Симд»-ы экссолисткæ, Хуссар Ирыстоны адæмон артисткæ Хуыгаты Олеся Иналы зыдта чысылæй фæстæмæ, цалын-мæ ансамблы иумæ кусын нæ райдыдтой, уæдмæ. Фидæны адæмон артисттæ репетицитæм цыдысты сæ ныййарджытимæ. Уый размæ та Инал æнтыстджынæй архайдта уæгъдибар хъæбысхæстæй. «Фæлæ уæддæр 13 аздзыдæй æрбацыд кафынмæ. Чысыл æмæ къæсхуыр уыд, фæлæ тынг рæхст хæххон кафт сæххæст кæнынмæ æмæ йæ сценæмæкæсæг бахъуыды кодта уымæй. Сывæллæтты ансамблы гастролон архайд куы фæцис, уæд та фæстæмæ спортмæ æрбаздæхт, фæлæ уæддæр сценæ уыд йæ дарддæры хъысмæт.
1997 азы Быценты Геннадийы фæхуыдтой ансамбль «Симд»-ы аивадон къухдариуæггæнæгæй. Уый райдыдта æвзонг кафджыты æмбырд кæнын. Растдæр уæд бамбæрста Инал, артисты курдиат ын Хуыцауæй, йæ ныййарджытæй лæвæрд кæй у, уый», – банысан кодта Хуыгаты Олеся.
Быценты Инал фæстаг хатт сценæйыл ралæууыд ацы аз 26-æм августы Уæрæсейы ‘рдыгæй Хуссар Ирыстоны хæдбардзинад банымайыны боныл 16 азы сæххæсты цытæн бæрæгбонон концерты. Раст æй цыма зонгæ кодта, йæ фæстаг ралæуд кæй у, уыйау æнæ-хъæнæй дæр йæхи радта сценæйæн. Афтæмæй, æвидигæ энергиимæ йæ бахъуыды кæндзысты сценæмкæсджытæ. Йæ ном, йæ фыд Геннадийы номау, рох никуы уыдзæн ирон адæмæй.
Газет «Хурзæрин»-ы коллектив
