Æрвылаз дæр республикæйы традицион сси мыхуыры бæрæгбон армукъа-фестиваль. Фæлæ ацы аз цы нæргæ бæрæгбон бацæттæ кодтой, ахæм дзы нæма уыд. Уый та баст у, ацы аз республикæйы цы бирæ кадджын мадзæлттæ уыд æмæ уыдзæн, уыимæ. Уыдон сты: Ирыстон Уæрæсеимæ баиуы цауыл – 250 азы, Дзæуджыхъæуы (Владикавказы фидар) сырæзтыл – 240 азы, республикæйы автономийыл – 100 азы æмæ Хетæгкаты Къостайы райгуырды 165 азы юбилейон цаутæ. Уымæ гæсгæ, ацы бæрæгбæтты фæлгæтты арæзт мыхуыры фæрæзты фестиваль-армукъа сси иннæ азтæй уæрæхдæр æмæ мидисджындæр æмæ ахаста æртæ боны.
Кадджын мадзалы архайдтой Мæскуыйæ, стæй сыхаг республикæтæ. Равдыст-армукъайы сæ мыхуыры продукци равæрдтой Цæгат Ирыстоны рауагъдадтæ «Ир» æмæ «Респект», Хуссар Ирыстоны рауагъдад «Мыхуыры хæдзар», Мæскуыйы – «Белый город», Ставрополы «Периодика Ставрополья», Мæхъæлы «Сердало», Дагестаны «Эпоха», Хъæрæсе-Черкесийы «Маьметекей», Цæцæны «Издательский дом», Кæсæг-Балхъары «Эльбрус»… Армукъайы алчидæр равæрдта сæ рауагъдадты хуыздæр продукци: культурæ, истори, аивады темæйыл фыст алыхуызон чингуытæ, периодикон мыхуыры журналтæ æмæ газеттæ, къæлиндартæ, алкæмæн йæ регионы рæсугъд бынæтты иллюстрацитæ, национ сувениртæ æмæ бирæ æндæр мидисджын продукци.
Уæрæсе æмæ Цæгат Ирыстоны гимны фæстæ, Кадджын мадзалы республикæйы Сæргълæууæг Сергей Меняйлойы номæй арфæйы ныхæстæ загъта Хицауады Сæрдары хæдивæг Александр Реутов æмæ арфæ ракодта мыхуыры кусджытæ æмæ уазджытæн:
«Абоны фестиваль арæзт æрцыд Цæгат Ирыстоны ацы азы юбилейон цауты фæлгæтты, æмæ мæ ныфс ис, йæ ахадындзинад дæр фылдæр кæй уыдзæн. Нæ республикæ – Кавказы культурон центр – кæддæриддæр чиныг кæсынмæ уыд раззагдæрты æхсæн. Уырны мæ, ам цы мингай чингуытæ ис, уыдон сæ кæсджыты кæй ссардзысты».
Бæрæгбоны кадджын уазæг уыд Чиныгуадзджыты Ассоциацийы президент Константин Чеченев. Уый зæрдæбын арфæ ракодта Ирыстоны цæрджытæ, уазджытæ æмæ организатортæн. Куыд банысан кодта, афтæмæй мах республикæйы уавæр хуыздæр у иннæтимæ абаргæйæ. Цы бирæ чингуытæ уагъд цæуы, уыдон дуканиты бирæ нæ фæстиат кæнынц. Æрфарсты бæрæггæнæнтæм гæсгæ, махмæ фылдæр кæсынц чиныг æмæ газет.
Фестиваль райдыдта фембæлд-дискуссийæ «Век цифры. Будущее печатной книги: жизнь или забвение». Архайдтой дзы Александр Реутов, Константин Чеченев, Республикон зонадон библиотекæйы директор Хайманты Иринæ æмæ иннæтæ. Ныхас цыд чиныджы абон æмæ фидæныл. Амыдта йæ Мыхуыры комитеты сæрдары хæдивæг Гæбæлаты Мæдинæ.
Мидисджын уыд Къостайы юбилейы кадæн поэтикон сесси «Весь мир – мой храм», зæгъгæ. Бæрæгбоны цы бирæ адæмыхæттытæ уыд, уыдонæй алчидæр йæхи æвзагыл каст Къостайы æмдзæвгæтæ. Поэты æмдзæвгæты æнæмæлгæ рæнхъытæ иронау бакастысты поэттæ Касаты Батрадз, Гасанты Валери, Годжыцаты Георги, дыгуронау – Гегкиты Солтан, цæцæйнаг æвзагыл, сæ адæмон поэт, мюзикл «Фатимæ»-йы автор Асламбек Тугузов, Цæцæны чингуыты рауагъдады директор Анзор Матаев, рауагъдад «Эпоха»- йы директор Хадизат Курахова, «Эльбрус»-ы директор Арсен Гергов, «Периодика Ставрополья»-йы директор Алла Абастова… Англисаг æвзагыл дзы цалдæр æмдзæвгæйы бакаст Дзрасты Виктор.
Бæрæгбоны программæйы ацы хай бацæттæ кодта æмæ йæ амыдта журнал «Мах дуг»-ы сæйраг редактор Хетæгкаты Оксанæ. Поэтикон сессийы фæлгæты ма ирон æрмдæсныйады куыстытæй сæ арæхстдзинад равдыстой 13 скъолайы ахуырдзауты сфæлдыстадон иугонд «Талатæ». Сæ разамонæг Танделаты Розæ.
Фестиваль-армукъайы ма уыд бирæ мадзæлттæ: ног чингуытæн презентацитæ, ирон хæринæгтæ кæнынæй мастер-къластæ, автортимæ фембæлдтытæ, лекцитæ, ирон мультипликацион æмæ документалон кинонывтæ…
Кæд æртæ боны дæргъы боныхъæд æвзæр уыд, уæддæр адæм цыдысты æмæ цыдысты. Æмæ ахæм рæстæджы адæймаджы ныфс бацæуы: нæй мыхуыргонд дзырдæн фесæфæн, нæй гæххæттыл фыст æрмæджытæн æмбал. Ахæм мадзæлтты рæстæджы рабæрæг вæййынц адæмы удварны миниуджытæ.
ДЖУСОЙТЫ Нинæ
