Цхинвалы районы милицийы управленийы фадыгон инспектор Хъазиты Георги æмæ фæндагон змæлды æдасдзинады хайады хистæр Кокойты Руслан сæхи æхцайы фæрæзтæй саразын кодтой æмæ раивтой æвæрæз бинонты рудзгуытæ. Æдæппæт уыдысты цыппар рудзынджы æмæ сæ аргъ та ахызт 37 мин сомæй.
Дменисы хъæуы цæрæг Джиголаты Сæлимæт рагæй хатыд бынæттон администрацимæ, цæмæй йæм фæкастаиккой йæ рудзгуытæ раивынмæ. Фæлæ сæм фæрæзтæ уыйбæрц никуы уыдис, æмæ цалдæр азы дæргъы Сæлимæт, йæ дыууæ æнахъом сывæллонимæ, зымæгон уазæлтты тыхстис. Фæззæджы æрлæудимæ-иу сыл æддейæ бакодта целлофантæ, цæмæй зыхъхъыртæй дымгæ ма дымдтаид æмæ цæрæнуаты хъармдæр уыдаид.
«Мæ фарсмæ арæх æрбалæууынц милицийы кусджытæ. Уæлдай райгонд та дæн нæ фадыгон инспекторæй æмæ йын стыр бузныг зæгъын. Уымæн æмæ мын йæхи æхцайы фæрæзтæй цалдæр хатты æрбахаста хæлцадон продукттæ, бакæны ма мын æндæр æххуыстæ дæр. Мæхæдæг кусын скъолайы сæрфæгæй, фæлæ мын дыууæ сывæллоны даринаг ис æмæ не ’ххæссын. Афтæмæй та ныр цалдæр азы дæргъы мæ рудзгуытæ уыдысты ивинаг. Бахатыдтæн бынæттон администрацимæ, фæлæ мын бамбарын кодтой, ома, нæм уыйбæрц фæрæзтæ нæй. Ныр мæм ссыдысты милицийы кусджытæ, сластой ног рудзгуытæ, скодтой кусджыты æмæ мын сæ раивтой. Иуæй мын тынг æхсызгон у, мæ проблемæ мын кæй аиуварс кодтой, иннæмæй та — сæ æфсæрмы кæнын. Цахæм арфæйы ныхæстæ сын ракæнон, уый дæр нал зонын», — зæгъы Сæлимæт.
Ацы бинонтæн бынæттон администраци алыгъуызон æххуыстæ арæх бакæны. Фæлæ ма йæм æппынæдзух сæ хъус дарынц милицийы æнахъомты фæдыл инспектортæ дæр. Ног ахуыры азмæ йын йæ 10-аздзыд чызджы сцæттæ кодтой скъоламæ — балхæдтой йын уæлæдарæс, къахыдарæс æмæ скъоламæ хъæугæ дзаумæттæ. Нæ баззайы рохуаты йе 3-аздзыд лæппу дæр.
Кæд æмæ милицийы кусджытæн сæ службæйон хæстæм нæ хауынц ахæм æххуыстæ кæнын, уæддæр сæм цы адæймагдзинад ис, уый сын бар нæ дæтты тыхст адæймагæн ма баххуыс кæнынæн. Не ’хсæн ахæмтæ фылдæр куы уа, уæд не ‘хсæнад æнгомдæр уыдзæнис æмæ зындзинæдтæн та фæразондæр уыдзыстæм.
ДЖИОТЫ Алыксандр
Comments are closed, but trackbacks and pingbacks are open.