Сывæллæттæн – ног чингуытæ

22-æм ноябры Информаци æмæ мыхуыры комитеты пресс-центры уыд презентаци фысджытæ Джыккайты Беллæ æмæ Бекъойты Майæйы чингуытæ «Алæмæттаг сис» æмæ «Уæсæг»-æн. Чингуытæ мыхуыргонд æрцыдысты РХИ-йы Информаци æмæ мыхуыры комитеты рауагъдадон къамисы уынаффæмæ гæсгæ. Се ‘ддаг бакаст æмæ сæ гъæд дзуапп дæттынц нырыккон домæнтæн. Ахадынц адæймаджы цæсты. Чингуыты нывгæнæг у Хъотайты Иринæ.

Презентацийы хайад райстой Информаци æмæ мыхуыры комитеты кусджытæ Хъотайты Марияйы сæргълæудæй, Тыбылты Алыксандры номыл Хуссар Ирыстоны паддзахадон университеты æмæ, скъолаты ахуыргæнджытæ, рæвдауæндæтты хъомыл-гæнджытæ. Мадзал бацæуæн ныхасæй байгом кодта Хъотайты Мария. Уый, фыццаджыдæр, банысан кодта æхсызгон ын кæй у, сывæллæттæн ног, рæсугъд  чингуытæ кæй  рацыдис мыхуыры, уый. «Фæстаг азты нæ республи-кæйы къухдариуæгад стыр хъусдард здахынц мадæлон æвзаг бахъахъхъæныны фарстмæ æмæ уымæ гæсгæ реализацигонд цæуынц сæрмагонд программæтæ дæр. Мах æрвылаз дæр нæ комитеты финансон уавæртæм гæсгæ, мыхуыры рауадзæм хуссарирыстойнаг фысджыты æмæ ахуыргæндты чингуытæ. Фылдæр ногæй уагъд цæуынц зæронд ахуыргæнæн чингуытæ æмæ къаддæр куыст та цæуы сывæллæттæн ног литературæ рауадзыныл. Банысан кæнын мæ фæнды уый æмæ махмæ фаг кæй нæй сывæллæтты литературæ. Абоны чингуыты рацыдыл мах цин кæнæм уый тыххæй æмæ сын кæй фæахъаз уыдзысты сæ зонындзинæдтæ æмæ хъомыладæн», – загъта Хъотайты чызг.

Сывæллæтты чингуыты фæдыл йæ хъуыдытæ загъта нæ университеты политологийы кафедрæйы ахуыргæнæг Æлборты Динæ. Уый банысан кодта, зæгъгæ, тынг хорз зонгæ у Джыккайты Беллæйы сфæлдыстадимæ æмæ йын стыр аргъ кæны йæ бакæнгæ куыстæн. «Джыккайты чызг кусы паддзахадон университеты нæ кафедрæйы æмæ мах уымæн вæййæм йæ фыццаг чиныгкæсджытæ. Стыр цымыдисимæ йын йæ аргъæутты бакæсынц нæ сывæллæттæ дæр. Цымыдисон ма уымæй у Беллæйы сфæлдыстад æмæ йын кæй рацæуынц куыд нæ мадæлон æвзагыл, афтæ уырыссаг æвзагмæ тæлмацæй дæр. Банысан кæнын мæ фæнды уый æмæ дыууæ чиныг кæй сты, сабитæ цахæм рæсугъд æмæ хуызджын чингуытæ фæуарзынц кæсын, раст ахæм. Мæнмæ гæсгæ, канд сывæллæттæ нæ, фæлæ ма сæ ныййарджытæ дæр стыр æхсызгонæй райсдзысты сæ къухтæм дыууæ чиныджы дæр. Стæй ма уый дæр æмæ сывæллонæн тынгдæр кæй бауарзын кæндзысты сæ мадæлон æвзаг æмæ сын кæй фæахъаз уыдзæн сæ ахуыры хъуыддаджы», – банысан кодта уый.

Хуссар Ирыстоны паддзахадон университеты профессор, уырыссаг æвзаг æмæ литературæйы ахуыргæнджыты Ассоциацийы сæргълæууæг Тедеты Залинæ дæр йæ раныхасы арфæ æмæ бузныджы ныхæстæ загъта чингуыты автортæн. Йæ цæст сын бауарзта, цæмæй дарддæр дæр кусой сывæллæтты хæрзиуæгæн. «Абоны бон махæн у куыд бæрæгбон, уымæн æмæ презентаци кæнæм нæ чысыл хуртæ фыццаг къахдзæфтæ кæмæй райдайой, ахæм чингуытæ. Сæ рацыдыл сын тынг фæцин кодтам, уымæн æмæ сты нæ рæзгæ хъæбултæн. Æз Беллæйы сфæлдыстадмæ рагæй дарын мæ хъус æмæ куыд рахатыдтæн, афтæмæй уымæн йæ курдиат иу чиныгæй иннæмæ ирддæрæй разыны. Абон ын цы чиныг презентаци кæнæм, уый æз бакастæн стыр æхцондзинадимæ. Йæ аргъæутты уынæм хæрам æмæ хæлар, рухс æмæ талынг тыхты тох. Сывæллæттæ æнцондæрæй хицæн кæндзысты, хорз æмæ æвзæр цы у, уый. Бекъойты Майæйы дæр хорз зонын. Уый у уырыссаг æвзаг æмæ литературæйы ахуыргæнæг. Ассоциацийæн арæх фыссы уацтæ, кæддæрид-дæр цымыдис кæны методикæйы фарстытæм. Тынг хорз хъуыддаг у уый æмæ сывæллæттæн радзырдтæ кæй фыссы. Саби ахæм радзырдты фæрцы базоны царды рухс фæндæгтæ, ахуырæн цы нысаниуæг ис, уый. Ацы радзырдты руаджы базондзысты хорз æмæ æвзæр, рæстдзинад æмæ æнæраст хъуыддæгтæ», – банысан кодта Тедеты Залинæ.

Бузныг æмæ арфæйы ныхæстæ ма чингуыты автортæн загъта уырыссаг филологи, журналистикæ æмæ фæсарæйнаг æвзаджы факультеты декан Биазырты Аллæ дæр. Уый дæр банысан кодта чингуыты æнæмæнгхъæуындзинад æмæ сыл уый фæстæ бæстон æрдзырдта.

Чингуыты рацыдыл æхсызгонæй кæй æмбæлдысты, уый тыххæй сæ хъуыдытæ дзырдтой презентацийы æндæр хайадисджытæ дæр æмæ арфæ кодтой автортæн. Джыккайты Беллæ æмæ Бекъойты Майæ дæр бузныг загътой сæ чингуытæ рауадзыны хъуыддаджы сæ фарсмæ чи æрбалæууыд, æппæт уыдонæн. Сæрмагондæй ма бузныг загътой РХИ-йы Информаци æмæ мыхуыры комитетæн, чингуыты фæзындæн финансон æххуыс кæй бакодтой. «Бузныг ма зæгъын нывгæнæг Хъотайты чызгæн. Тынг хорз бакуыста чингуыты нывтыл, сывæллæттæн уыдзысты цымыдисон. Кæсын чи нæ зоны, уыцы сабитæ дæр сæ райсдзысты  æхцондзинад», – йæ арфæйы ныхасы зæгъы Джыккайты чызг.

Презентацигонд чингуыты редактор фыссæг Наниты Асиат дæр йæ раныхасы банысан кодта, чингуытæ абон стыр æхсызгонæй кæй хъæуынц хуссарирыстойнаг сывæллæтты æмæ бузныджы ныхæстæ загъта Джыккайты Беллæ æмæ Бекъойты Майæйæн сæ хорз куысты тыххæй. «Тынг зын у фыссын сывæллæттæн, фæлæ сæм ацы чызджытæ сæ ныфс бахастой æмæ ныр сты нæ разы. Уый тыххæй уын зæгъын стыр бузныг, арфæгонд ут уе сфæлдыстадон хъуыддаджы æмæ та нын рæхджы нæ зæрдæтæ уæ ног чингуытæй цы барухс кæнат, уый уын мæ зæрдæ зæгъы», – загъта Наниты Асиат.

Мадзалы уæвæг æппæт уазджытæн дæр автортæ арфæйаг ныхæстимæ балæвар кодтой сæ ног чингуытæй æмæ банысан кодтой чингуытæ лæвæрд кæй æрцæудзысты ахуырадон уагдæттæ æмæ библиотекæтæм.

Нæ уацх.