Нæ горæты 9-æм иумиагахуырадон скъолайы сабитæ организаци «Раззагонтæ»-йы фæлгæтты ауагътой акци «Стыр тæригъæдкæнынады бæсты – чысыл æх-хуыс». Мадзал бацæттæ кодтой организаци «Раззагонтæ»-йы раздзог Багаты Фатимæ, Танделаты Галинæ æмæ 6-æм къласы ахуыргæинæгты иу къорд. Мадзалы сæйраг уазæг уыд Знауыры районы Æвæрдхъæды хицау Плиты Лаврик. Танделаты Галинæ куыд загъта, афтæмæй ацы акци ауадзын-мæ сæхи цæттæ кодтой раздæрæй. «Не скъолайы ныр цалдæр азы уæвынад кæны сывæллæтты организаци «Раззагонтæ», уыдонæн сæ программæйы нывæзтмæ хаст ис Райгуырæн бæстæмæ уарзон ахаст дарын, æрдзыл аудын, хъус æм æрдарын æмæ цæрæгойтæн æххуыс кæнын. Бæлвырд куыд у, афтæмæй ацы аз, уалдзæджы, зайæгойты къуыбырракалды фæстæ фæуазæлттæ ис, ныссалд бæлæсты къуыбыр æмæ уымæ гæсгæ фæззæг у мæгуыр. Уый уæлдай тынгдæр бандæвта хъæддаг сырдты уавæрыл, нæй сын фаг хæлц. Сырдтæ та хæлцагур сæхи раппарынц хъæуты ‘рдæм. Кæй зæгъын æй хъæуы, цæрджытæ æвзарынц тас æмæ сæ куынæг кæнынц. Уыдæттæ хынцгæйæ, мах сфæнд кодтам ацы хæрзаудæн акци ауадзын».
Танделаты Галинæ ма куыд загъта, афтæмæй «хæрзаудæн акци бацæттæ кæныны хайад райстой æрмæст раззагонты къорд нæ, фæлæ 6-æм къласы ахуыргæнинæгтæ се ‘ппæт дæр. Ахуыргæнинаг Уалыты Азæмæт æрбахаста дыууæ голладжы дзаг халсæрттæ. Афтæ скъоладзаутæ се ‘ппæт дæр райстой активон хайад æмæ равдыстой сæ аудгæ ахаст сырдтæм».
Акцийы фæлгæтты æрæмбырд кодтой алыгъуызон халсæрттæ, чи сæ хаста сæхи сæрмагонд цæхæрадæттæй, чи та сæ æлхæнгæ кодта, афтæмæй æрæмбырд кодтой дзæвгар халсæрттæ.
Æвæрдхъæды хицау Плиты Лаврик куыд загъта, афтæмæй сырдты уавæр æцæгæйдæр у мæгуырау, кæд сын сæхæдæг амæлттæ кæнынц, арынц сын хæринаг, уæддæр æййафынц хъуагдзинæдттæ. «Махæн тынг æхсызгон у ацы лæвар райсын, уæлдайдæр та сабиты къухæй. Уымæн æмæ сабитæ хъуамæ исой хъомылад æрдзмæ аудгæ ахаст дарыны фæдыл. Ахæм мадзæлттæ уадзын сын ахъаз фæуыдзæн сæ зæрдæты æрдзмæ æмæ сырдтæм уарзондзинад райтынг кæнынæн. Вæййы афтæ æмæ сабитæй бирæтæ хъæддаг цъиуты фæмарынц æнæхъуаджы. Ахæм хъомыладон акциты рæстæджы та уыдон бамбардзысты, афтæ раст кæй нæу, æмæ нал кæндзысты æнæуаг митæ».
Халсæртты уæлдай ма ахуыргæнинæгтæ самал кодтой æндæр хъæугæ минералтæ, кæцытæ зымæгон рæстæджы цæрæгойтæн сты æнæмæнгхъæуæг æмæ сын уыдон дæр арвыстой. Плиты Лаврик куыд загъта, афтæмæй хъæддаг сырдтæй иуæй-иуты æнæмæнгæй фæхъæуы цæхх бастъæрын. Уыдон уымæй исынц фаг æнæмæнгхъæугæ минералтæ. Ахуыргæнинæгтæ нын цы цæххы къæрттытæ балæвар кодтой, уыдон уал афæдзы фаг уыдзысты.
Раззагонты къорд сырдтæн балæвар кодтой уырыдзы, цæхæра, кабускъæтæ, цæхх, мæнæу æмæ бирæ æндæртæ. Ам ис æрсытæ, хъæддаг хуытæ, тæрхъустæ, сæгуыттæ. «Ахæм хæрзаудæн æххуыс махæн никуы ма ничи бакодта, уымæ гæсгæ æз бузныг зæгъын, акци ауадзынæн чидæриддæр ахъаз фæцис, уыдонæн. Стыр бузныг ахуыргæнджытæн, рæзгæ фæлтæры æрдзмæ аудгæ ахаст дарыныл чи ахуыр кæны, уыдонæн. Уый, мæнмæ гæсгæ, у ахсджиаг хъомыладон фарст», загъта Плийы-фырт.
«Раззагонтæ» нырма у хæрз æрыгон организаци, фæзынд 2018 азы 22 декабры. Советон дуджы уыд æнгæс организаци Пионертæ, зæгъгæ. Куыд Пионертæ, афтæ раззагонты рæнхъытæм чи хъуамæ бахиза, уый райсы ардбахæрд, организацийы нывæзты цы фарстатæ ис, уыдон æнувыдæй кæй æххæст кæндзæнис, уый тыххæй. Хистæр раздзогтæ, къласгæстæ, ахуыргæнинæгтыл бабæттынц бурхуыз хъуырылдарæнтæ æмæ æрæвналынц сæ хæстæ æххæст кæнынмæ.
Хуссар Ирыстоны сабиты организаци «Раззагонтæ» йе сконды иу кæны куыд горæты, афтæ республикæйы районты скъолаты уæвæг организациты, къухдариуæг ын кæны Ахуырады министрады цур Координацион совет.
ХУЫГАТЫ Миленæ
Comments are closed, but trackbacks and pingbacks are open.