Спорт

БОКС

Хуссарирыстойнаг боксертæ Цхуырбаты Арсен æмæ Гатыгкоты Аслан систы 13-14-аздзыд спортсменты ‘хсæн профцæдисты æхсæнад «Россия»-йы физкультурон-спортивон централон советы чемпионаты уæлахиздзаутæ. Цхуырбаты Арсен 66 кг уæзы категорийы архайгæйæ, финалы фæуæлахиз  Ростовы областы минæвар Гиви Гарсеванидзейыл. Гатыгкоты Аслан та 60 кг уæзы категорийы финалы рамбылдта Курскы областы спортсмен Виктор Журавлевы.

Тренертæ Куымæридтаты Родион æмæ Тедеты Аликы хъомылгæнинæгтæ ацы уæлахизы фæрцы райстой 13-14 аздзыд спортсменты ‘хсæн Уæрæсейы чемпионаты хайад райсыны бар, кæцы уагъд цæудзæн май мæйы Анапайы. Ацы горæты ма апрелы мæйы та уагъд æрцæудзæн Уæрæсейы чемпионат 15-16-аздзыд боксерты ‘хсæн. Уым дæр хайад райсдзæн хуссарирыстойнаг боксер.  66 кг уæзы категорийы Ирыстоны спортивон кад хъахъхъæндзæн Гæджиты Гурам, кæцы у ацы кары спортсменты ‘хсæн Уæрæсейы æмбырдгонд командæйы уæнг.

***

Хуссар Ирыстоны боксы скъолайы хъомылгæнинæгтæ ма сæхи аккагæй равдыстой 12-13-аздзыд спортсменты ‘хсæн Минеральные Водыйы горæтон зылды гом чемпионаты. Бантыст сын æхсæз сыгъзæрин æмæ дыууæ та æвзист майданы рамбулын. Ерысты уæлахиздзаутæ систы Адзи-ты Владимир (36 кг), Тамаз Багаури (25 кг), Гæбæраты Алим (60 кг), Плиты Эри (35 кг), Къæбулты Арсен (42 кг) æмæ Уалыты Аслан (71 кг). Дыккаг бынæттæ та бацахстой Плиты Вадим (42 кг) æмæ Санахъоты Давид (56 кг).

Спортсменты тренертæ сты Дзигойты Ацæмæз, Тедеты Алик æмæ Куымæридтаты Родион.

 

ГОМ ТУРНИР ВОЛЕЙБОЛÆЙ

Цхинвалы скъоладзауты ‘хсæн уагъд æрцыд горæты гом турнир волейболæй. Ерысты хайад райстой 19 командæйы. Уыдонæй 10 уыдысты лæппуты командæтæ, 9 та – чызджыты. Уыдон дих уы-дысты фæйнæ дыууæ къордыл. Хъæзтытæ уыцы иурæстæджы уагъд цыдысты дыууæ бынаты – Республикон комплексон спортивон скъолайы æмæ 6-æм астæуккаг скъолайы спортивон залты.

Лæппуты ‘хсæн ерысты финалы фембæлдысты Къуайсайы скъола æмæ гимназ «Альбион»-ы командæтæ. Хуыздæр сæхи равдыстой къуайсайæгтæ æмæ систы ерысты уæлахиздзаутæ. Гимназ «Аль-»-ы ахуырдзаутæ та ацыдысты дыккаг бынатыл. Æртыккаг бынат та бацахста 1-æм скъолайы командæ.

Чызджыты ‘хсæн дæр финалы фембæлдысты гимназ «Альбион» æмæ Къуайсайы скъолайы командæтæ. Ацы хъазты та цæттæдæр разындысты гимназ «Альбион»-ы ахуырдзаутæ æмæ рахызтысты фыццаг бынатмæ. Къуайсайаг чызджытæ та ацыдысты дыккаг бынатыл. Æртыккаг та ссис 6-æм скъолайы командæ.

«Ацы ерыстæ фæуадзæм æрвылаз дæр æмæ сæ алы хатт дæр активон хайад райсынц Цхинвалы ахуырдзаутæ. Ацы аз ауагътам гом турнир æмæ дзы хайад райста Къуайсайы командæ дæр. Стыр бузныг мæ фæнды зæгъын ерысты сæйраг тæрхонгæнджытæ Джиоты Эльзæ æмæ Кокойты Эдуардæн», – банысан кодта г.Цхинвалы администрацийы спорты хайады сæргълæууæг Битеты Гурам.

Бæрæг ма æрцыдысты ерысты хуыздæр хъазджытæ. Лæппуты ‘хсæн сæрмагонд призтæ райстой Ко-заты Арсен, Хуыгаты Артур, Гатыгкоты Тимур, Хуыгаты Радислав æмæ Козаты Арсен.

Чызджыты ‘хсæн та иууыл хуыздæр сæхи равдыстой Козаты Аннæ, Тамара Гогинашвили, Хъотайты Виктория, Зассеты Алинæ æмæ Гуыбеты Джессика.

ХУРИТЫ Батрадз