Республикæ Хуссар Ирыстоны æппæт скъолатæ дæр ифтонг æрцыдысты ахуыргæнæн чингуытæй. Уымæй фæцис Ахуырады министрады сæрмагонд программæйы фæстаг, æртыккаг этап. Уыдон сæ куыст райдыдтой 2016 азы. Сæ сæйраг нысан уыд, цæмæй скъолаты библиотекæтæ ифтонг æрцæуой æппæт ахуыргæнæн чингуытæй дæр. 2016 азы уал чингуытæ æлхæд æрцыдысты райдиан кълæстæн, 2017 азы – 5-9 кълæсты онг. Ацы аз та 10-11 кълæстæн. Ныр республикæйы скъолатæ се ‘ппæт дæр ифтонг сты ахуыргæнæн чингуытæй.
Августы мæйы куыд ахуыргæнджытæ, афтæ ныййарджытæ дæр сæхи фæцæттæ кæнынц ног ахуыры азы райдианмæ. Ныр ныййарджыты чингуытæ æлхæнын кæй нал хъæудзæн, уый стыр æхсызгон æмæ стыр æххуыс у куыд уыдонæн, афтæ ахуыргæнджытæ æмæ ахуыргæнинæгтæн сæхицæн дæр. Скъолатæ æппæт чингуытæй дæр ифтонг кæй æрцыдысты, уымæй скъолаты библиотекæты кусджытæ дæр хæсдзысты стырдæр бæрндзинад, цæмæй чингуыты фонд бахъахъхъæной. Сывæллæттæ æмæ ныййарджытæ дæр хъуамæ аудгæ ахаст дарой сæ чингуытæм, уымæн æмæ уыцы чингуытæй ахуыр кæндзысты радон ахуыры азы æндæр сывæллæттæ. Чингуыты фонд ног кæндзæнис фондз азæй фондз азмæ.
РХИ-йы Ахуырад æмæ зонады министрады сæйраг специалист Санахъоты Ланæ куыд загъта, уымæ гæсгæ ныр ахуыргæнинæгтæн се ‘ппæтæн дæр сæ бон уыдзæн 1-æм сентябрæй чингуытæ æнæаргъæй райсынæн. «Зæгъын мæ фæнды уый æмæ нын стыр æххуыс кæй бакодта нæ горæты Хъайтарты уынджы «Чингуыты дуне»-йы хицау Уалыты Бэлæ дæр. Уый ныридæгæн чингуытæ адих кодта æмæ сæ аласта скъолаты æппæт библиотекæтæм дæр»,- загъта Санахъоты Ланæ.
Гимназ «Альбион»-ы директор Гуыцмæзты Иринæ стыр бузныг зæгъы, ацы хъуыддагмæ йæ хайбавæрд чи бахаста, уыдонæн се’ппæтæн дæр. «Сæрмагонд бузныг мæ зæгъын фæнды Ахуырад æмæ зонады министр Гасситы Наталийæн æмæ æппæт коллективæн кæй батыхстысты ууыл, цæмæй сывæллæттæ ифтонг æрцыдаиккой æнæаргъ чингуытæй. Зæгъæн ис æмæ не скъолайæн чингуыты проблемæ нал уыдзæн», – загъта уый.
Кокайты Заринæ
Comments are closed, but trackbacks and pingbacks are open.