Цæгат Ирыстоны

СПОРТ – ÆНÆНИЗДЗИНАДЫ  ГУЫРÆН

Цæгат Ирыстоны физикон культурæ æмæ спорты министрады сæргъ Хуыгаты Аланы æрлæудæй республикæйы спорты рæзтмæ бирæ ногдзинæдтæ хаст æрцыд. Министр йæ ног азы плантимæ дзыллон хабархæссæг фæрæзтæн куыд фехъусын кодта, афтæмæй 2020 аз байгом уыдзæн спортивон хъæбысхæстæй цæттæдзинады центр. Ног спортивон комплексы уыдзæн цалдæр дæлхайады: тренировкæты дыууæ залы, тренажерты, боксы æмæ рог атлетикæйы залтæ. Центры уыдзæн 400 бадæн бынаты. Проекты арæзтадæн фæрæзтæ дихгонд æрцыд “УФ-йы физикон культурæ æмæ спорты рæзты” сæрмагонд федералон прог-раммæйы фæлгæтты.  

Федералон центры æххуысæй ацы аз райдайдзæн республикон стадион “Спартак”-ы рацарæзт, стæй Æрыдоны ног спортивон комплексы арæзтад. Ацы аз ма ноджыдæр планмæ хаст ис  Футболы академи бакæнын. Нырыккон спортивон-тренировкæгæнæн комп-лексы арæзтады сæйрагдæр нысан у дæсны спортсменты ног фæлтæртæ хъомыл кæнын. Академимæ æрвыст цæудзысты курдиатджын фæсивæд Ирыстоны алы къуымтæй. Хъомыл дзы кæндзысты, нæ футболон командæты фидæны сæ хъазтæй чи рафидауын кæна, ахæм фæсивæд. Уыдон, спортæй уæлдай, исдзысты æппæтвæрсыг ахуырад дæр. Сæрмагонд цæстдард ис Дзæуджыхъæуы спорты ног галуаны арæзтадмæ дæр. Цæттæ цæуы проектон-сметон документаци. Проект царды уагъд хъуамæ æрцæуа 2021 азы.

 Куыд зонæм, афтæмæй ивгъуыд аз дæр Ирыстоны спортивон цард хъæздыг уыд алы цаутæй. Сæрмагонд программæйы фæрцы республикæйы арæзт æрцыд цыппар физкультурон-дзæбæхгæнæн комплексы, цалдæр хъазæнхиирхæфсæн фæзы, цалцæггонд æрцыдысты бирæ хъæууон скъолаты залтæ. Уымæй дарддæр, республикæ суазæг кодта алы æмвæзады ахсджиаг ерыстæ.

ЦÆМÆЙ  ГРИППÆЙ  ÆДАС  УÆМ…

Январь-февралы мæйты зынгæ фæфылдæр вæййы грипп æмæ æндæр ахæм вирусон низтæй рынчын адæмы нымæц. Ныр дæр сагъæсы æфтауы сыхаг республикæты уавæр. Бирæ рæтты æвæрд æрцыд карантин. Цæгат Ирыстоны нырма уавæр нывылдæр у, фæлæ гриппы ныхмæ хъæуы рагацау æппæт мадзæлттæ саразын.

Уыцы æууæл хынцгæйæ, куыд Уæрæсейы иннæ регионты, афтæ Цæгат Ирыстоны дæр санитарон цæстдарды ведомствотæ æмæ медицинон кусæндæттæ, адæмы æнæниздзинад ба-хъахъхъæныны нысанимæ иудадзыгдæр æххæст кæнынц профилактикæйы алыхуызон мадзæлттæ. Уыдонæй иу у адæмы дзыллон вакцинаци.

“Роспотребнадзор”-ы управленийы куыд фехъусын кодтой, афтæмæй федералон бюджеты хардзæй афойнадыл æлхæд æрцыд гриппы ныхмæ хос. Ныртæккæ республикæйы гриппы ныхмæ цы вакцинæ ис, уый фæрцы уколтæ скæнæн ис республикæйы цæрджыты æмбисæн.

Адæмæн вакцинаци кæнынц бынæттон поликлиникæты, кæнæ сæрмагонд медицинон къордтæ ацæуынц организацитæм.

Нæ  уацх.