РХИ-йы Сæйраг Советы фыццаг сæвзæрст депутатты къорды хъусынгæнинаг

Мах, Республикæ Хуссар Ирыстоны фыццаг сæвзæрст Парламенты депутатты къорд, кæцытæ иууыл активондæр хайад райстой республикæ расидын бацæттæ кæныны, фæстæдæр та райстой Хæдбардзинады акт,  стыр тасдзинады æнкъарæнтимæ нæ хъус дарæм фæстаг бонты республикæйы æрцæугæ цаутæм.

Æрцыд стыр трагеди, фæмард æвзонг æмбæстаг Дзабиты Инал Сергийы фырт.

Мах зæрдæрыстæй мæсæллæй кæнæм зианджын бинонтæн.

Генералон прокуратурæ загъта фæмардуæвæджы уголовон хъуыддаджы зæрдæхсайгæ аххосджынты нæмттæ. Мидхъуыддæгты министрады зæрдæхсайгæтæм  ахасты Цхинвалы горæтон тæрхонгæнæг равзæрста тæрхон – ахæстоны фæбадын. Мах уырны, ацы фыдракæнды аххосджынтæ, кæцытæ амардтой æвзонг адæймаджы, закъонмæ гæсгæ карз æфхæрд кæй баййафдзысты. Нæ хъуыдымæ гæсгæ, лæмбынæг сахуыр кæнын хъæуы ацы фарст æрбæстон кæныны хъуыддаджы прокуроры бæрндзинады бæрц дæр.

Хъыгагæн, æрцæугæ трагедийæ иуæй-иу оппозицион политикон тыхты лидертæ пайда кæнынц сæхи сæрмагонд нысæнттæн, æмæ сæ политикон домындзинæдтæ размæ кæнгæйæ, республикæйы æвзæрын кæнынц æндыгъддзинад.

Раныхасгæнæн ис дæхи зылды æвзарджыты номæй, партийы уæнгты номæй. Раныхасгæнæн ис митинджы уæвæг адæмы номæй дæр, фæлæ адæмы номæй дзурыны бар никæмæн ис. Махæй никæмæ сты æппæт адæмы домæнтæ æмæ уый тыххæй  соцхызæджы дæр æмæ сидтыты дæр «адæм домынц Президенты отставкæ» дзурын у закъоны ныхмæ.

Бæрæг ма у ахæм факт дæр, æмæ ныры хицауиуæгады чи критикæ кæны, уыдонæн сæ фылдæр соцхызæджы фыссынц фæсномыгæй. Уыдон цæрынц республикæйæн æддейæ. Се ‘цæг цæсгом æмбæхсгæйæ, уыдон адæммæ сидынц митингтæм, закъонæй æвзæрст хицауиуæгады раппарынмæ, уымæй гуымир æгъдауæй халынц республикæйы закъæттæ.

Æппæт уыдæттæ æрцæуынц, фæмардуæвæг æмбæстаджы бинонты цæссыгтæ куынæма басур сты, уæд. Уый цæуы, республикæ йæ сырæзтыл 30 азы сæххæсты юбилеймæ йæхи куы цæттæ кæны, уæд.

Куыд республикæйы æппæт цæрджытæ, афтæ мах, фыццаг сæвзæрст Парламенты депутатты фæнды сабырдзинад æмæ æнцой цард нæ уаз зæххыл.

Уый сæраппонд мах стæм хицауиуæгады æнæзакъонон раивды ныхмæ æмæ домæм, цæмæй республикæйы æхсæнадон-политикон уавæр базмæлын кæныны тыххæй деструктивон архайдтытæ урæд æрцæуой. Сæдæгай æвзонг лæппутæ сæ сæртæ уый тыххæй не ‘рхастой нывондæн, цæмæй абон нæ бæстæйы уа хаос æмæ æнæзакъондзинад. Паддзахады проблемæтæ скъуыддзаг нæ цæуынц митингты (уымæй дæр æнæсанкцион митингты), фæлæ фынгы фарсмæ, бадзырдон процессы руаджы.

Мах сидæм республикæйы цæрджытæм, кæцытæ се уæхсджытыл рахастой ивгъуыд æнусы 90-æм азты зындзинæдтæ, цæмæй  ацы хатт дæр равдисой сæ куырыхондзинад æмæ ма аразой алыгъуызон провокацитæ.

Æфсымæртæ æмæ хотæ! Знаджы фæндиаг нæхи ма фæкæнæм!

Хицауиуæгады къабæзты ‘хсæн ахæм кризистæ нæ историйы бирæ уыдис, фæлæ-иу кæддæриддæр фæуæлахиз куырыхондзинад æмæ-иу цытимæ рахызтыстæм кризисæй. Нæ хъуыдымæ гæсгæ, Президент дæр, Парламенты оппозицион депутаттæ дæр хъуамæ кæрæдзи фехъусой æмæ бамбарой. Нæ хъуыдымæ гæсгæ, Парламенты куысты æрурæд  мах хорзмæ не ‘ркæндзæн.

Махмæ, фыццаг сæвзæрст Парламенты депутаттæм, стыр фæлтæрддзинад ис æхсæны лæгты миссийы хъуыддаджы æмæ нæ уый тыххæй фæнды не ‘ххуысы къух уæм фæдарæм, фæнды нæ баххуыс уын кæнæм Президентимæ политикон партиты (депутатон корпусы) фембæлды, фыццаг Парламенты депутатты хайадистæй, цæмæй æппæт фарстатыл дæр æруынаффæ чындæуа бадзырдты фынгы фарсмæ.

РХИ-йы фыццаг сæвзæрст Сæйраг Советы (Парламенты) депутаттæ: Челæхсаты Хъазбег, Битеты Хъамболат, Харебаты Леонид, Кокойты Тарзан, Джиоты Мурат, Тыджыты Айлар, Уалыты Розæ, Кокойты Геннади, Медойты Димитр.

P.S. 4-æм сентябры митинджы раныхас кæныны рæстæджы Президент Бибылты Анатоли позитивон аргъ скодта ацы фæндонæн æмæ загъта, зæгъгæ, цæттæ у оппозицион партиты лидертимæ фембæлынмæ æмæ æппæт фарстатыл дæр æруынаффæ кæнынмæ, РХИ-йы фыццаг сæвзæрст Сæйраг Советы (Парламенты) депутатты хайадистæй.