Рæхджы Хуссар Ирыстоны мыхуыры рацæудзысты авд чиныджы, кæцытæн сæ рауадзыны хъуыддагыл ныридæгæн куыст цæуы нæхи типографы. Чингуытæ рухс фендзысты, нæ республикæйы Информаци æмæ мыхуыры комитеты рауагъдадон къамисы уынаффæмæ гæсгæ 2019 азæн цы план сарæзтой, уый фæстиуæгæн. Фæстаг цалдæр азы чиныгкæсджытæ æвдисæн сты рауагъдады æвæрццаг динамикæйæн. Уымæ лæмбынæг хъусдард аздæхтой нæ республикæйы къухдариуæгад.
Хуссарирыстойнаг фысджытæн сæ чингуытæ мыхуыры кæй рацæудзысты, уый тыххæй нын радзырдта Мыхуыры хæдзары директор Бæззаты Алан. Уый куыд банысан кодта, афтæмæй ныртæккæ чингуытæ рауадзыны хъуыддаг цæуы æнæкъуылымпыйæ æмæ рæхджы рухс фендзысты цалдæр чиныджы. «Махæн нæ цард размæ цæуы æмæ не ‘хсæнады дæр æмæ адæмы дæр бахъуыд чингуытæ уадзыны сæр. Алы азы райдианы дæр мах сфидар кæнæм нæ тематикон план æмæ уыцы планмæ гæсгæ æххæст кæнæм чингуытæ уадзыны куыст. Уый тыххæй кусы къамис æмæ та ныр дæр æвзæрст æрцыдысты, аккагыл кæй банымадтой, уыцы фысджыты æмбырдгæндтæ. 2019 азы нæм хъуамæ мыхуыры рацæуой авд чиныджы. Уыдон сты: Хъодалаты Герсаны æмдзæвгæты æмбырдгонд «Лирикæ»-йы дыккаг том, Харебаты Батрадзæн йæ мысинæгты чиныг «В нужное время, в нужном месте», Биазырты Роланды «Публицистикæ», Плиты Ильяйы «Уарзын райгуырæн бæстæ». Плиты Ильяйæн æрæджы банысан кодтам йæ сæдæ азы юбилей æмæ йын ныр та фыццаг хатт мыхуыр кæнæм, Советон дуджы рухс чи нæ федта, уыцы æмдзæвгæтæ, Плиты Гацырæн та – «Плитæ æмæ Рукъгом». Ам автор рæгъмæ хæссы Плиты мыггаджы зынгæдæр адæймæгты æмæ Рукъгомы цард. Ныридæгæн чиныг ис типографы æмæ йын кусынц йæ рауадзыныл. Мыхуыры рацæудзысты Цхуырбаты Мерийы «Уацмыстæ» æмæ ма Бекъойты Майæйы чиныг «Уасæг» дæр.
Уæлдæр банысангонд чингуытæ сты нæ тематикон планæн йæ фыццаг хай. Чингуытæ иууылдæр сты сæ рауадзыны фæндагыл, куыст сыл цæуы æмæ рæхджы фендзысты рухс. Нæ тематикон планæн йæ дыккаг хай нырма фидаргонд нæу. Тагъд рæстæджы рауагъдадон къамис æрбамбырд уыдзысты æмæ аскъуыддзаг кæндзысты, дарддæр кæй уацмыстæ рацæуой мыхуыры, уый. Нæ республикæйы Информаци æмæ мыхуыры паддзахадон комитеты сæрдары бардзырдмæ гæсгæ къамисы сæргълæууæг хъуамæ уа Гæбæраты Юри. Уыдон Хъотайты Марияимæ иумæ снысан кæндзысты къамисы ног сконд дæр æмæ уый фæстæ бакусдзыстæм нæ тематикон планы дыккаг хайыл. Дыккаг хаймæ нæ бахæссын фæнды цыппар чиныджы. Уыдон сты Гусаты Ленгиоры чиныг «Этнические «метаморфозы» или грузинизация негрузин», Джыккайты Беллæйæн – «Алæмæттаг сис», кæцы фыст æрцыдис сывæллæттæн, дохтыр Зæгъойты Никъалайæн йæ мысинæгтæ 2008 азы августы хæсты тыххæй «Кто смог пережить, тот должен иметь силу помнить» æмæ Къуезерты Петры «Календарь памятных дат на 2020 год». Æхсызгон хъуыддаг уыдзæнис, ацы чингуытæ мыхуыры куы рацæуой æмæ нæ библиотекæты тæрхджытыл сæ бынæттæ куы ссарой, уæд», – загъта Бæззаты Алан.
Уый ма куыд банысан кодта, афтæмæй ивгъуыд аз Мыхуыры хæдзар рауагъта фараст чиныджы. Чингуытæ рауадзыны хъуыддагæн æрвылаз дæр республикæйы бюджетæй рахицæнгонд æрцæуынц æхцайы фæрæзтæ, кæцыты бæрц хизы дыууæ милуан æмæ æхсæз сæдæ мин сомы бæрцмæ. «Мæн ма фæнды банысан кæнын уый, æмæ фæстаг азты нæ хицауад уæлдай хъусдард здахы мадæлон æвзаджы рæзтмæ. Уымæ гæсгæ нын бюджетæй æрвылаз дæр рахицæнгонд æрцæуы дыууæ милуан æмæ æхсæз сæдæ мин сомы бæрц, кæцытæ нысанмæздæхтæй хардзгонд æрцæуынц чингуытæ рауадзыныл», – загъта Бæззаты Алан.
ЦХУЫРБАТЫ Ларисæ
Comments are closed, but trackbacks and pingbacks are open.