Равзар хъæуæг професси

Æрæввахс та кæны, фæстаг хæрзбон куы зæгъдзысты нæ республикæйы иумиагахуырадон скъолаты ахуыргæнинæгтæ скъолайæн æмæ сæ уарзон ахуыргæнджытæн уыцы бон. Ацы аз Хуссар Ирыстоны скъолатæн хæрзбон зæгъдзысты 411 рауагъдоны. Уыдонæй 54 фæнд кæнынц майы мæйы иууон паддзахадон фæлварæнтæ радтын Цæгат Ирыстон-Аланийы, цæмæй стæй ахуырмæ бацæуой Уæрæсейы уæлдæр ахуыргæнæндæттæм.

Ныййарджыты фæфæнды, цæмæй сæ сывæллæттæ суой юристтæ, экономисттæ кæнæ дохтыртæ. Афтæмæй та нæ паддзахад æййафы хъуагдзинад бирæ æндæр професситæй, кæцыты бацæттæгæнæн ис бынаты. Цæвиттон, Цхинвалы медицинон ахуыргæнæндон 90 азмæ æввахс цæттæ кæны республикæйы æнæниздзинад хъахъхъæнынады фадыгæн кадртæ. Æрвылаз дæр дæсгай медицинон кусджытæ куыст ссарынц нæ республикæйы медицинон уагдæтты.

Бæрæг куыд у, афтæмæй ацы медицинон ахуыргæнæндон хæссы зындгонд дохтыр Карсанты Уасилы ном. Бындур ын æвæрд æрцыд 1931 азы. Уæдæй нырмæ уагдон бацæттæ кодта мингай медицинон хотæ. Цæгаты дæр æмæ Хуссар Ирыстоны рынчындæтты бирæ кусы ахæм дохтыртæ, кæцытæ сæ фæндаг медицинæмæ райдыдтой ацы ахуыргæнæндонæй.

Медицинон ахуыргæнæндоны Стыр Фыдыбæстæйон хæсты рæстæджы уыд эвакуацион госпиталь. Уырдæм ластой Стыр Фыдыбæстæйон хæсты быдыртæй уæззау цæфтæ æмæ сæ ирвæзын кодтой мæлæтæй. Уымæ гæсгæ хæст куы фæцис, уæд уыдонæн, ома, кусджытæн лæвæрд æрцыд Стыр Фыдыбæстæйон хæсты архайджыты статус.

Ныртæккæ ацы ахуыргæнæндонмæ уадиссаг бирæ студенттæ нал цæуы.  Ахуыргæнæндоны ахуыргæнджытæ куыд зæгъынц, афтæмæй: «Уымæн йæ фыццаг аххосаг у скъолаты рауагъдонты фылдæр бæрц сæ ных кæй саразынц Уæрæсейы уæлдæр ахуыргæнæндæттæм, чи лимиты фæрцы, чи та йæхи тыхтæй.  Ам чи баззайы, уыдонæн та сæ фылдæр хай бацæуы ахуыр кæнынмæ ХИПУ-мæ», – зæгъы директоры хæдивæг Дзуццаты Альмæ.

Кæй зæгъын æй хъæуы, уыцы хъуыддаг та мæгуырау æндавы, медицинон ахуыргæнæндонмæ чи цæуы, уыцы студентты нымæцыл. Æнæуый та, уагдоны ис нывыл уавæртæ, ахуырæн  сæрмагонд кабинеттæ, спортивон зал, хæрæндон. Дæрддзæф хъæутæй æрцæуæг студенттæн – æмдзæрæндон,  ис сын уавæртæ практикæйы цæуынæн дæр. Ам ахуыр чи фæвæййы сырх дипломыл, уыдон æнæ фæлварæнæй бацæуынц Уæрæсейы уæлдæр ахуыргæнæндæттæм медицинон хаххыл.

Дзуццаты Альмæ дæнцæгæн æрхаста цалдæр ахæм ахуыргæнинаджы: «Нæ студенттæй иу – Тыджыты Яник ахуыр кæнынмæ ацыд Уæрæсейы æфсæддон медицинон академимæ æмæ нæм уырдыгæй хъуысынц йе ‘нтыстытæ. Нæ рауагъдонтæй бирæ кусынц дохтыртæй Цæгат Ирыстон-Аланийы рынчындæтты дæр. Бирæтæ дарддæр сахуыр кодтой æмæ абон сты Дзæуджыхъæуы хуыздæр дохтыры нымæцты. Зæгъæм, кардиолог Гæджиты Константин, Медойты Вадим æмæ æндæртæ».

Уый ма банысан кодта медицинæйы рæзты концепцийы фæлгæтты къорд ивындзинæд-тæ кæй æнхъæлмæ кæсы медицинон ахуыргæнæндонæн йæхимæ. Ног ахуыры аз уал ам бакæндзысты фельдшерон факультет, уымæн æмæ республикæйы районты цы фельдшерон пункттæ бакодтой, уыдон хъуагдзинад æййафынц профессионалон кусджытæй.

Куыд зонæм, афтæмæй Инвестпрограммæйы фæлгæтты ФАП-тæ баконд æрцыд æппæт республикæйы районты, суанг дæрддæзæф хъæуты дæр. Уыдонæй 16 сты модулон. «Мах нæ фельдшерон факультеты цæттæ кæндзыстæм медиктæ ФАП-тæн, кæцытæ хъæууон уавæрты ивдзысты дохтырты æмæ кæндзысты цæрджытæн фыццаг медицинон æххуыс», – банысан кодта медицинон ахуыргæнæдоны ахуыры хайады сæргълæууæг.

Ныртæккæ медицинон ахуыргæнæдоны квалификаци фæбæрзонддæр кæныны нысанæн медицинæйы фадыджы астæуккаг персонал цæуынц курсыты.

«Медицинон хотæ рацæудзысты дыууæмæйон ахуыр. Æнæниздзинад æмæ социалон рæзты министрад сарæзтой номхыгъдтæ ахæм уагæвæрдмæ гæсгæ, цæмæй медицинон уагдæтты, персоналы цухдзинад ма уа», – загъта ма Дзуццаты Альмæ.

Уазæгты Марфа