Нæ республикæйы æртæ районы æрæвнæлдтой æфсирон культурæты тыллæг æфснайыны куыстытæм. Хæдзарадтæ уалдзæджы байтыдтой фæззыгæнд мæнæу, стæй ма хъæбæрхоры культурæдæр. Ацы куыстыты цырд фæлæууыдысты механизатортæ æмæ æвæстиатæй æххæст кодтой сæ куыстытæ. Рæстæджы цыдимæ æвзартæ рæзтысты æмбæлон æгъдауæй æмæ хоркуыстгæнджыты уыд ныфс, сæ фæззæджы бæркад та кæй уыдзæн зæрдæйы фæндиаг, фæлæ афтæ нæ рауад, мæгуырау боныгъæдтæ кæй ахаста, уый аххосæй. Тыллæгæфснайыны куыстытæм рæвдзæй бавнæлдтой Ленингоры районы хоркуыстгæнджытæ, уымæн æмæ сын æркæрдинаг ис дзæвгар фæзуæттæ. Тракторон бригадæйы бригадир, комбайнер Габиты Хвича йе ‘мкусджытæ Мæргъиты Бесик æмæ Хуриты Сосланимæ тыллæг æфснайыны куыстытæ кæнынц Цъинагар, Орчъосан æмæ Абреуы быдырты. Райдианы тыллæгæрзадæй рухс кодта сæ зæрдæ, фæлæ, куыд ма загътам, афтæмæй мæгуырау боныгъæдтæ æвзæрæрдæм бандæвтой куыд куыстыты цыдыл, афтæ тыллæгæрзадыл дæр. Габийы фырт куыд загъта, афтæмæй сын бантыст 600 гектары бæрц хъæбæрхор æмæ мæнæуы хуымтæ бафснайын. Фæлæ ныртæккæ хæдзарадты сæргълæуджыты зæрдæ нал рухс кæны тыллæгæрзадæй, ома, гектарон тыллæгæрзад æрхауд 5 центнермæ.
Æфсирон культурæты тыллæгæрзад ноджы мæгуыраудæр у Знауыры районы хæдзарадты. Ам дæр зæхкусджытæ байтыдтой дзæвгар фæзуæттæ Мугут, Уелит, Еред, Ионча, Урсдуртæ, Бадатæ æмæ æндæр бынæтты. Бæргæ æнхъæлмæ кастысты амы зæхкусджытæ дæр хорз тыллæгæрзадмæ, фæлæ къæвдатæй дарддæр æфсирон культурæты хуымтæн тынг разиан кодта стыр ихуард дæр. Тракторон бригадæйы бригадир Наниты Талик куыд загъта, афтæмæй уал комбайнертæ Кокойты Валери, Гæззаты Алыксандр, Наниты Алик æмæ Гæджиты Георгийæн бантыст 150 гектары ныккæрдын.
ХУЫБИАТЫ Никъала
