Рæсугъддзинад чи не ‘нкъары, сыгъдæгдзинад æхцондзинад кæмæн нæ хæссы, ахæм адæймаг, æвæццæгæн, стæм разындзæнис. Фæлæ, хъыгагæн, махæй алчи нæ фæтырны, нæ фæархайы, цæмæй нæ алыварс рæсугъд æмæ аив уа. Мах фæдомæм, цæмæй цы уынджы цæрæм, уый сыгъдæг æмæ аив, хæрзарæзт уа. Фæлæ нæхицæй нæ фæдомæм, цы хæдзары цæрыс, уый раз расыгъдæг кæнын, фадат кæм ис, уым дидинджытæ, æндæр цъæхдарæнтæ ныссадзын, цæмæй дæхицæн дæр æмæ дæ хæдзары рæзты чи цæуынц, уыдонæн дæр сæ уынд æхцондзинад хæсса. Горæты бирæ фæзындис ахæм цæрджытæ, йæ хæдзары раз дидинджытæй чи сфæлыста, зæрдæ æмæ цæстытæ сæ рæсугъддзинадæй чи рæвдауынц. Фæлæ горæты уынгты бирæ рæтты фенæн ис тротуартыл змис æмæ арæзтадон æрмæджыты кæлдтытæ. Уыдон цалдæргай азты лæзæрынц уынгты æмæ сын халынц сæ хуыз.
Сæ хæдзæртты рæзтæ срæссугъд кæныны бæсты дзы бауромынц хæлд, кæлæццаг машинæтæ æмæ уымæй иуæй уынг фæфыдуынд кæнынц, иннæмæй та тротуартыл цæуджытæн æвзæрын кæнынц зындзинад.
Рæсугъддзинад зæрдæйæ чи æнкъары æмæ йæ алыварс цæмæй рæсугъд уа, ууыл чи архайы, ахæмтæ бирæ ис бирæуæладзыгон хæдзæртты цæрджытæй дæр. Ацы аз дæр та нæ горæты Коцойты Арсены уынджы 41 æмæ 43 бирæуæладзыгон хæдзæртты цæрджытæ сæ уынгтæ ссыгъдæг, срæсугъд кодтой. Уыдон сæрмагонд зиутæм нæ фенхъæлмæ кæсынц, фæлæ рацæуынц æмæ ныссыгъдæг кæнынц сæ афæмблай территори. Афтæ уыд ныр дæр. Ныссыгъдæг кодтой сæ кæрт æмæ та дидинджытæ ныссагътой, сæрмагондæй кæй рахицæн кодтой, ахæм бынаты. Уæлдай фердæхтдзинад равдисынц Гæбæраты Земæ, Чехойты Лидæ æмæ Къæбулты Евелинæ. Фыццаг хатт сын дидинджыты садзæнтæ балхæдта Хаситы Мзия æмæ ныр та тауинæгтæ сæхæдæг саразынц, æлхæнын сæ нал фæхъæуы…
Уæдæ алы цæрæн корпусы, алы хисæрмагонд хæдзары цæрджытæ дæр куы архаиккой, сæ хæдзæртты раз куыд æмбæлы, афтæ срæсугъд кæныныл, уæд нæ горæт уаид бирæ рæсугъддæр. Зæгъын хъæуы уый, æмæ нæхицæн æнцон аразæн цы вæййы, уымæ дæр хатт фенхъæлмæ кæсæм кæмæдæр.
Сыгъдæгдзинад нæхи хъæуы æмæ йыл тыхсгæ дæр нæхæдæг хъуамæ кæнæм. Рæсугъддзинад кæй хæдзары раз фенæм, æхцондзинад кæм райсæм, уым нæхимид, æнæмæнг, зæрдæбын арфæ ракæнæм, уыцы хæдзары чи цæрынц, уыдонæн.
Бестауты Валя
