Республикæ Хуссар Ирыстоны Президент Бибылты Анатоли хайад райста горæт Къуайсайы сывæллæтты лагерь «Фарн» байгом кæныны цытджын церемонийы. Сæрдыгон лагерь йæ дуæрттæ байгом кодта 70 сывæллонæн, уыдоны нымæцы 50 сывæллоны сты Донецкы æмæ Луганскы Адæмон Республикæтæй æрцæугæтæ.
Паддзахады сæргълæууæг æппæт æрæмбырдуæвджытæн раарфæ кодта ахæм нысаниуæгджын боны цытæн.
«Мах фæнды, цæмæй сымах ам цы рæстæг арвитат, уый уа иууыл зæрдæмæдзæугæ æмæ нæм ноджы æрцæуат. Кæй зæгъын æй хъæуы, мах уый тыххæй æппæтдæр сараздзыстæм. Мæ цæст уын уарзы, хуссарирыстойнаг сывæллæттимæ цы хæлардзинад сæвзæрд, уый, цæмæй æнустæм баззайа æмæ фидæны уыдонимæ цæрат хæларæй æмæ кæрæдзиæмбаргæйæ», – загъта Бибылты Анатоли, уазджытæм дзургæйæ.
Мадзалы фæстæ РХИ-йы Президент йæ цæст ахаста, сывæллæттæн цы цæрыны фадæттæ ис, уыдоныл æмæ бацамыдта, цæмæй цы цухдзинæдтæ ис, уыдон иуварс æрцæуой.
Банысан кæнын хъæуы, Къуайсайы сæрдыгон æнæнизгæнæн лагерь кæй сорганизаци кодта республикæйы ахуырад æмæ зонады минстрад астæуккаг иумæйаг ахуырадон скъолайы базæйыл. Сывæллæттимæ кусыны бæрндзинад хæссынц квалификациджын педагогон сконд æмæ лæггадгæнæг персонал, ис дзы хъахъхъæнæг æмæ медицинон кусæг.
Дыууæ къуырийы дæргъы сывæллæттæ бабæрæг кæндзысты Дзауы районы фендтаг бынæттæ. Уымæй уæлдай ма æрвылбонон культурон-ирхæфсæн программæ сывæллæттæн фадат ратдзæн сæ зонындзинæдтæ фылдæр кæнынæн æмæ ног ахуыры азмæ сæ тыхтæ æрæмбырд кæнынæн.
Comments are closed, but trackbacks and pingbacks are open.