Политикон уынаффæ: Абхазы президент ацыд отставкæйы

12-æм январы Абхазы президент Рауль Хаджимба фехъусын кодта, зæгъгæ, цæуы отставкæйы. Республикæйы премьер-министр паддзахады сæргълæууæджы фыстæг бакаст протестгæнджытæн. «Хъусын уын кæнын, зæгъгæ, æз æвæрын ме ‘ххæстбартæ бæстæйы стабилондзинад бахъахъхъæныны тыххæй», – дзырдæуы Рауль Хаджимбайы фыстæджы.

«Цæмæй тугкалд ма æрцыдаид, цæмæй республикæйы стабилондзинад уа, уый тых-хæй Хаджимба райста отставкæйы ацæуыны тыххæй уынаффæ», – фехъусын кодта Абхазы вице-президент Аслан Барциц.Протестгæнджытæ хъусынгæнинагыл сæмбæлдысты къухæмдзæгъдимæ.

Хуыцаубоны, 12 январы изæры Абхазмæ æрцыд Уæрæсейы президенты æххуысгæнæг Владислав Сурков. Уый фембæлд абхазаг лидеримæ. Оппозицийы лидер Аслан Бжанияйы хъуыдымæ гæсгæ,  Абхазы политикон кризис иуварс æрцыд. Йæ ныхæстæм гæсгæ уавæр æрбæстон кæныны хъуыддаджы стыр нысаниуæг ис Уæрæсейæн. 10-æм январы УФ-йы Æдасдзинады советы секретары хæдивæг Рашид Нургалиевæн баныхæстæ уыд Рауль Хаджимбаимæ.  «Фæнды мæ банысан кæнын уавæр сабырадон æгъдауæй аскъуыддзаг кæныны тыххæй Уæрæсейы Федерацийы ахсджиаг нысаниуæджы тыххæй. Нургалиев æмæ Сурков стыр хайбавæрд бахастой политикон  кризис æрбæстон кæныны хъуыддагмæ», – загъта Бжания.

Хаджимба отставкæйы кæй ацыд, уыцы уынаффæйы æвварс рахæцыд йæ политикон оппонент Алхас Квициния. «Кæй зæгъын æй хъæуы, æз ацы уынаффæйæ баззадтæн райгондæй. Уый уыд иунæг фæндаг нæ бæстæйы уавæры стабилондзинады тыххæй», – загъта уый.

Уый размæ 10 январы Абхазы Уæлдæр тæрхондон аивта президентон æвзæрстыты фæстиуджытæ, кæцытæ уагъд æрцыдысты ивгъуыд аз сентябры мæйы. Хуыцаубоны, 12-æм январы Абхазы Централон æвзарæн къамис снысан кодта республикæйы  президентон æвзæрстытæ ногæй 22-æм марты ауадзын. Æвзæрстыты хайад райсын сæ бон уыдзæн ног кандидаттæн дæр.

Куыд хъусын кæнынц, уымæ гæсгæ Рауль Хаджимба хайад нал райсдзæн æмгъуыдæй раздæр уагъдцæуæг президентон æвзæрстыты.

Уæ зæрдыл уын лæууын кæнæм, Абхазы протестон митингтæ кæй райдыдтой 9-æм январы. Уыцы бон изæрæй Абхазы парламент бахатыд Хаджимбамæ, цæмæй барвæндæй æрæвæра бæстæйы сæргълæууæджы æххæстбартæ стабилондзинад бахъахъхъæныны тыххæй. Йæ рады бæстæйы хъахъхъæнынады министр Мираб Кишмария компромиссмæ æрсидт хицауад æмæ оппозицимæ.  Рауль Хаджимба Абхазы президент уыд 2014 азæй фæстæмæ. 2019 азы сентябры уый æвзæрст æрцыд ног æмгъуыдмæ, фæлæ æвзæрстыты фæс-тиуджытимæ разы нæ уыд оппозици. Оппозицийы фарсхæцджыты куыд нымайынц, уымæ гæсгæ ивгъуыд аз сентябры мæйы Абхазы уагъдцæуæг президентон æвзæрстыты Хаджимба нæ райста хъæлæсты фылдæр хай.

 13-æм январы Абхазы Парламент райста Рауль Хаджимбайы отставкæ. Бæстæйы президенты хæстæ æххæст кæндзæн премьер-министр Валери Бганба.