Горæт Цхинвалы милицийы патрулон-постон службæйы кусджытæн та радон хатт уагъд æрцыд марш-бросок. Службæйон цæттæдзинады нормативты фæлгæтты развæлгъау арæзт æрцыд график, сфидар кодтой мадзал ауадзыны маршрут æмæ стæй, кæм лидзгæйæ, кæм та – цырд къахдзæфтæй цæугæйæ, сæххæст кодтой сæ разылæууæг хæстæ, ома сæ алчи дæр дистанци алыгъдис банысангонд рæстæгмæ.
Маршрутæн равзæрстой микрорайон «Хурзæрин»-æй Присы хъæумæ, кæцыйы дæрддзæг у 7 километры бæрц. Милицийы кусджытæ бынатмæ æрбацыдысты сæрмагонд уæлæдарæсы, се ‘ккой сæ табелон æхсæнгæрзтæ, афтæмæй. Цхинвалы милицийы сæргълæууæджы хæдивæг Габуты Сергойы ныхæстæм гæсгæ, патрулонпостон службæйы кусджытæ равдыстой хорз цæттæдзинад.
«Æз райгонд дæн мæ дæлбар æмкусджытæй, сæ службæйон цæттæдзинадмæ сын ахæм профессионалон ахаст кæй ис, уый тыххæй. Махæн марш-бросоктæ вæййы арæх æмæ та сæм ныр дæр равæлгъау цæттæ уыдыстæм. Уый æддейæ ма нæ куысджытæн вæййы алыгъуызон ахуыртæ спорты æндæр хуызтæй дæр, исынц теоретикон зонындзинæдтæ дæр, вæййынц полигоны дæр табелон æхсæнгарзæй æхсынмæ. Не рвылбонон куысты нын ахæм домæнтæ ис, æмæ æдзух цæттæ хъуамæ уæм фыдгæ-нæгæн ныхкъуырд раттынмæ», – зæгъы Габуты Серго.
Марш-бросокты рæстæджы ма семæ вæййынц медикон-санитарон хайы кусджытæ дæр. Уыдонæн сæ хæс у, цæмæй кусджыты хиæнкъарынадмæ сæ хъус лæмбынæг дарой æмæ куы бахъæуа, уæд тагъд медицинон æх-хуыс бакæной. Дистанци цахæм уавæрты алидзынц милицийы кусджытæ, уыцы процессмæ та æнæмæнг сæ хъус фæдарынц милицийы управленийы къухдариуæгад, цæмæй хатдзæгтæ саразой æмæ дзы кæд исты хъæндзинæдтæ рабæрæг уа, уæд сæ аиуварс кæной.
ДЖИОТЫ Алыксандр
Comments are closed, but trackbacks and pingbacks are open.