Стыр Уæлахизы боныл 78 азы кæй æххæст кæны, уый фæдыл 9 майы Театралон фæзуаты уагъд æрцæудзæнис æфсæддон парад. Йæ хайадисджытæ ныридæгæн æрæвнæлдтой рæнхъон тренировкæтæм нæ республикæйы Хъахъхъæнынады министрады плацы æмæ æрвылбон дæр хуыздæр кæндзысты сæ арæхстдзинад.
Парады хайад райсдзысты нæ республикæйы тыхон структурæтæ, УФ-ы Хъахъхъæнынады министрады 4-æм гвардион æфсæддон базæ æмæ УФ-йы Федералон æдасдзинады службæйы Арæнхъахъхъæнæг управленийы минæвæрттæ. Мидхъуыддæгты министрадæй дæр дзы хайад райсдзысты 100 адæймагæй фылдæр – уыдоны ‘хсæн сылгоймæгты парадон расчет дæр. Уымæй уæлдай ма Милицийы Сæрмагонд Нысаниуæджы къорды моторизацигонд хайад дæр сæхи цæттæ кæнынц парадмæ – механизацигонд колоннæйы рацæудзысты «БТР-80» æмæ «Тигр»-тæ.
ДЖИОТЫ Алыксандр
