Президент Гаглойты Алан «В ознаменование 15-летия Победы в Отечественной войне народа Южной Осетии»-йы юбилейон майдантæй схорзæхджын кодта Хуссар Ирыстоны областон советы ХХ сæвзæрст адæмон депутатты, Республикæ Хуссар Ирыстоны I сæвзæрст Парламенты депутатты, афтæ ма Республикæ Хуссар Ирыстоны фыццаг Централон æвзарæн къамисы уæнгты иу къорды.
Хорзæхтæ дæттыны церемони ауагъдæуыд Уæрæсейы Федерацийы æрдыгæй Республикæ Хуссар Ирыстоны хæдбардзинад банымайыны боны бæрæгбоны цытæн.
«Абон юбилейон майдантæй схорзæхджын кæнынмæ фæхуыдтам, нæ республикæйы паддзахаддзинады рæзты райдианы чи лæууыд, уыдон. Хуссар Ирыстонæн уæззау азты сымах фидардзинад æмæ патриотизм кæй равдыстат, уый руаджы нæ адæм абон цæрынц хæдбар æмæ сæрибар республикæйы», – загъта Гаглойты Алан.
Банысан кодта, зæгъгæ, 2008 азы 26 август Хуссар Ирыстоны адæмæн у æцæгæй нысаниуæгджын бон.
«Ацы бонмæ мах дæргъвæтин рæстæджы æнхъæлмæ кастыстæм. Махæн, республикæйы æмбæстæгтæн, уæззау æвзарæнтæ чи бавзæрстой æмæ дыркъуым фæндæг-тыл чи рацыдысты, уыдонæн ацы бон у сæрибардзинады, хæдбардзинад æмæ хъæлдзæгдзинады бон. Уый нæ къухы стыр аргъæй бафтыд. Æппæт нæ адæм фидар æмæ удуæлдайæ бафæрæзтой зындзинæдтæ æмæ фыдбонтæн. Уыдонæй алчи дæр стыр цыт æмæ бузныджы аккаг у», – загъта уый.
