Номдзыд кафæджы царды цаутæй

   Ирон кафты аивадмӕ стыр бавӕрд бахаста зынгӕ кафӕг, хореограф, педагог ӕмӕ ӕхсӕнадон архайӕг, сгуыхт артист Хетӕгкаты Владимир Михаилы фырт. Уымӕн йӕ 100 азы юбилейы тыххӕй къаннӕг брошюрӕ рауагъта нӕ зынгӕ балетмейстер Саулохты Мэлс ӕмӕ дзы дзуры йӕ цард ӕмӕ сфӕлдыстады тыххӕй, бакӕсӕн дзы ис бирӕ цымыдисон ӕрмӕг. Фӕлӕ зӕгъын хъӕуы, стыр адӕймаджы тыххӕй ам алцы загъд не ‘рцыд. Амӕйразмӕ мӕм ӕрбафтыд Гуырдзыстоны кафты ансамблы къордимӕ Лондоны сӕ аивад куы ӕвдыстой, уыдӕтты тыххӕй Хетӕгкайы фыртӕн йӕхи къухӕй фыст ӕрмӕг. Уыдоныл хореографийы чингуыты никуы фембӕлдтӕн, ӕнӕуый та сты ахсджиаг ӕмӕ сӕ, уадз, ӕмӕ газеткӕсӕг дӕр зона.

 Хетӕгкаты Владимиры царды стыр цау уыд, 1935 азы июлы райдианы Лондоны адӕмон кӕфтыты ӕхсӕнадӕмон фестивалы хайад кӕй райста, уый. Уый лӕууыд гуырдзиаг кафджыты къорды сӕргъ. Куыд зӕгъы, афтӕмӕй уый хӕдтӕхӕгыл атахт Кавказы хӕхты сӕрты хицæнæй, цӕмӕй рӕстӕгыл уыдаид Мӕскуы-йы ӕмӕ йе ‘мбал кафджытӕн сӕ документтӕ бацӕттæ кодтаид. Мӕскуымӕ атӕхыны размӕ уал уый ӕвӕстиатӕй баиу Фӕскавказы культурон бастдзинады ӕхсӕнадимӕ ӕмӕ изӕры 7 сахатыл фембӕлд аэропорты, Тифлисӕй чи ратахт, уыцы кафджыты къордыл. Дыккаг бон Мӕскуыйы уыд ӕркаст ӕмӕ равзӕрстӕуыд кафджыты къорд. Ленинградӕй денджызы ацыдысты тӕвддзу «Сибирь»-ыл 1935 азы 11 июлы ӕмӕ ӕрхӕццӕ сты 18 июлы. Уыцы изӕр сӕ аивад равдыстой Лондоны хуыздӕр залтӕй сӕ иу – «Альберт холл»-ы, уый фӕстӕ та сӕ ахӕм программӕимӕ аивадуарзджытӕ кастысты «Виктория – Парчы» залы. Концерты фӕстӕ автобусмӕ базгъордта иу чызг ӕмӕ  Хетӕгкайы фырты къухты фӕсагъта англисаг ӕвзагыл уагъд газет. Уадидӕгӕн базыдта, уыцы газет коммунистон мыхуыры орган кӕй у, уымӕн ӕмӕ фыццаг фарсыл уыд И. Сталины ныв. Концерты фӕстӕ азарыдысты «Интернационал» ӕмӕ уырыссаг зарӕг «Веселые ребята». Советон делегацийӕн тӕлмацгӕнӕг уыд, рӕстмӕ уырыссаг ӕвзаг чи нӕ зыдта, ахӕм англисаг чызг. Уый бахатыд Хетӕгкайы фыртмӕ, цӕмӕй йемӕ ацыдаид, ӕрзылдаиккой магазинтыл ӕмӕ йын баххуыс кодтаид исты балхӕнынӕн, фӕлӕ чызджы уыцы фӕндыл не сразы. Хетӕгкаты Владимиры диссаджы кафт тынг фӕцыд англисӕгты зӕрдӕмӕ, 10 мин адӕймаджы кӕм цыд, уыдон нал ӕнцадысты сӕ тыхджын къухӕмдзӕгъдӕй. Уыцы чызг ма йын загъта, зӕгъгӕ, мӕ уарзон фыдӕн дӕ кафтӕй нал ис ӕрӕнцой, уый дӕ хъаматимӕ кафгӕ куы федта, уӕд. Курӕг дæ у, цӕмӕй баззайай ам, Лондоны, мах дын балхӕндзыстӕм автомобиль, ратдзыстӕм дын дзӕвгар фунттӕ. Уымӕй дарддӕр ма дын уыдзӕн рекламӕ ӕмӕ амондджынӕй цӕрдзынӕ немӕ. Фӕлӕ ирон адӕймаг уыдӕттӕ не схаста йӕ сӕрмӕ, ӕмӕ не сразы сӕ фӕндоныл.

ХУЫБИАТЫ Никъала