Цӕмӕй ногазон бӕрӕгбонтӕ сабырӕй ӕмӕ ӕнӕфыдбылызӕй ацӕуой, уый фӕдыл Мидхъуыддӕгты министр Наниты Игорь йӕ радон ӕмбырды бахӕсджын кодта ӕмбӕлон службӕты сӕргълӕуджыты, цӕмӕй ныридӕгӕн сӕ хъус дарой ӕхсӕнадон фӕткхалджытӕм ӕмӕ алыхуызон знагиуӕггæнæг элементтӕм. Уый банысан кодта, зӕгъгӕ, кӕд ивгъуыд къуыри нӕ республикӕйы территорийыл фыдракӕндтæ не ‘рцыдис, уӕддӕр ӕнӕмӕнгӕй уӕлдай хъусдард здахын хъӕуы адӕмы ӕдасдзинад хъахъхъӕнынмӕ.
Фӕстаг бонты ӕрцыдис цалдӕр фӕткхалӕн цауы, кӕцытӕ баст сты ӕнӕзакъонӕй наркотикон буарадтӕй пайда кӕнын ӕмӕ парахат кӕнынимӕ. Цхинвалы 44-аздзыд сылгоймаджы магазины милицийы кусджытӕ ссардтой, «снюс» кӕй хонынц, ахӕм буарады ссадӕджы 79 пакеты, кӕцыйӕн нӕ бӕстӕйы уӕй кӕныны бар нӕй. Фӕткхалӕджы тӕрхондоны уынаффæмæ гæсгæ ахӕстоны сбадын кодтой дыууӕ мӕйы ӕмгъуыдмӕ. Уымӕй уӕлдай ма урӕд ӕрцыдис горӕты 32-аздзыд цӕрӕг, кӕцымӕ басгӕрсты рӕстӕджы хӕдзары ссардтой гӕны ссадӕг. Фӕткхалӕгыл Слестгӕнӕн управлени бакодта уголовон хъуыддаг. Ацы ӕрцӕугӕ хабӕртты фӕдыл Наниты Игорь бахӕсджын кодта профилон службӕты, цӕмӕй сӕ куыст фӕактивондӕр кӕной ӕмӕ сбӕрӕг кӕной, ӕнӕзакъонӕй наркотикон буарадтӕй чи пайда кӕны, уыцы ӕмбӕстӕгты.
Ведомствӕйы сӕргълӕууӕг милицийы фадыгон инспекторты бахӕсджын кодта, цӕмӕй ныридӕгӕн зилой дуканитыл ӕмӕ карзӕй ӕфхӕрой гуыппгӕнӕнтӕ, кӕнӕ ма алыхуызон контрафактон пиротехникон ӕрмӕджытӕ кӕм ӕййафой, уыцы дуканиты хицӕутты ӕмӕ ма æндæр амалиуӕггӕнджыты, кӕцытӕ уӕй кӕнынц ацы товартӕ. Уымӕй уӕлдай ма министр бардзырд радта, цӕмӕй ӕхсӕнгарз цы ӕмбӕстӕгтӕм ис, уыдонӕн бабӕрӕг кӕной, цавӕр уавӕрты сæ дарынц, уый Æхсӕнгарз дарынӕн æмбӕлон уавӕртӕ кӕмӕн нӕ уа, уыдоны кӕндзысты административон бӕрндзинадмӕ.
ДЖИОТЫ Александр
Comments are closed, but trackbacks and pingbacks are open.