Хетæгкаты Къостайы номыл Хуссар Ирыстоны паддзахадон драмон театры труппæ рæхджы байгом кæндзæн йæ ног сезон. Уый тыххæй нын фехъусын кодта театры пресс-службæ.
2008-æм азы августы хæсты бонтæ æрымысыны сæраппонд, театрдзаутæн æнæаргъæй 7-æм августы равдисдзысты Остъаты Аланы уацмысмæ гæсгæ æвæрд спектакль «Фæстаг æвдисæн». Спектаклы æвæрæг-режиссер та у театры аивадон къухдариуæггæнæг Дзуццаты Тамерлан.
Остъаты Алан йæ пьесæ бацæттæ кодта, Гуырдзыстоны хицауад нын нæ адæмæн цы геноцид сарæзта, ууыл сæдæ азы сæххæсты цытæн. Спектаклы æвдыст цæуынц гуырдзиаг меньшевиктæ 1920-æм азы куыд мардтой сабырцæрæг, æнæаххос адæмы, уый. Цæвиттон, æртындæс ироны цы уазал ныккæнды дардтой хъизæмарæй сæ мæлæты размæ æмæ сæ уый фæстæ Згъудеры къуылдымы куыд фехстой, уыцы трагикон цау сценæйыл цæуы дзæвгар рæстæг æмæ уый дæр фаг у, цæмæй адæймаг бамбара ирон адæммæ гуырдзиæгтæ цы зæрдæ дардтой, цы фыдмитæ сын кодтой, уый. Уæд бирæ хъæутæ федзæрæг сты æмæ уыцы нывтæн ногæй æвдисæн уыдзысты театрдзаутæ.
Театры пресс-службæйы ма нын куыд фехъусын кодтой, афтæмæй августы кæрон адæмы рæгъмæ рахæсдзысты зындгонд драматург Григорий Горины уацмысмæ гæсгæ æвæрд спектакль «Тиль». Ног спектакль сæвæрыныл кусынц режиссер Джеллыты Хъазбег æмæ нывгæнæг Найфонты Давид. Ацы проект реализацигонд цæуы Республикæ Хуссар Ирыстоны Культурæйы министрады заказ æмæ финансон æххуысы руаджы.
«Спектакль «Тиль» мах фæнд кодтам ивгъуыд театралон сезоны кæрон равдисын, фæлæ нын адæмы рæгъмæ хаст не ‘рцыдис бæрæг аххосæгтæм гæсгæ. Ныридæгæн спектаклыл куыст цæуы æмæ йын рæхджы уыдзæн премьерæ. Уымæй дарддæр ма театрдзаутæм æнхъæлмæ кæсы Хуыгаты Георы уацмысмæ гæсгæ æвæрд комедион спектакль «Мæ усы мад». Стыр программæ цæттæ кæнынц нæ университеты актерон факультеты студенттæ дæр. Уыдон сценæмæкæсджытæн равдисдзысты шоу-концерт. Театр ма фæнд кæны сæвæрын спектакль «Маугли» æмæ аргъау «Золотая рыбка». Ног спектаклтыл бакусдзыстæм «Тиль»-ы премьерæйы фæстæ», – фехъусын кодтой театры пресс-службæйы.
ЦХУЫРБАТЫ Ларисæ
