Парламенты раз уыдис цытджын мадзал — Мидхъуыддæгты министрады дæлхæйттæн радтой ног службæйон автотранспорт. Мадзалмæ фæуазæг сты бæстæйы президент Гаглойты Алан, Хуссар Ирыстоны Уæрæсейы Федерацийы Ӕххæстбарджын минæвар Марат Кулахметов, Мидхъуыддæгты министрады къухдариуæгад йæ министр Гæззаты Валерийы сæргълæудæй, нæ республикæйы тыхон структурæты минæвæрттæ æмæ журналисттæ.
Ног хæдтулгæты нымæц æдæппæт уыд 37 иуæджы — уæрæсейаг маркæтæ «Лада Гранта», «ВАЗ-2121» æмæ «УАЗ». Ацы автотранспорт адих кодтой министрады дæлхæйттыл — ОМОН, СОБР, горæты æмæ районты управленитыл. Бæстæйы Президент æмæ Уæрæсейы минæвар цытджын æгъдауæй машинæты дæгъæлтæ радтой дæлхæйтты хистæртæм.
Райдианы раныхас кодта ведомствойы сæргълæууæг Гæззаты Валери, кæцы банысан кодта, ног автотранспорт æххуысы хуызы фыццаг хатт кæй нæ исынц Уæрæсейæ, уый. «Нæ уæрæсейаг коллегæты фæрцы азæй-азмæ хуыздæр кæны нæ министрады материалон-техникон ифтонгад. Ныфс мæ ис, ног автотранспорт райсынимæ нæ службæйон хæстæ ноджы бæрзонддæр æмвæзадыл кæй æххæст кæндзыстæм. Ныридæгæн уал нæ горæты патрулон-постон службæйы архайд ракодтам ног системæмæ, кæцы хъуамæ фæахъаз уа хуыздæр, æнтыстджындæр куыстæн. Ӕмæ нын ам ног автотранспорт нæ къух хорз сараздзæнис. Уымæй уæлдай ма Уæрæсейы фæрцы тагъд раивдзыстæм нæ рæнхъон сконды табелон æхсæнгарз дæр. Стæй ма ноджы фæхуыздæр кæндзыстæм „Ӕдас горæт“-ы системæйы куыст дæр», — загъта Гæззаты Валери.
Марат Кулахметов та йæхирдыгæй фæнысан кодта, ома, ахæм æххуыстæ Уæрæсейы Федераци аразы ныр цалдæр азы дæргъы материалон-техникон ифтонгады программæйы фæлгæтты, кæцыйы нысанмæздæхт у барадхъахъхъæнæг органтæн æмбæлон уавæртæ саразынмæ.
Гаглойты Алан йæ раныхасы бузныджы ныхæстæ загъта Уæрæсейы Федерацийы къухдариуæгадæн æмæ ма æппæт уыдонæн, кæцыты фæрцы Хуссар Ирыстонмæ цæуы алыгъуызон æххуыс.
«Мидхъуыддæгты министрады кусджытæн мæ зæрдæ зæгъы, цæмæй ног автотранспортыл фæрнæй кусой. Милицийы цæсгомджын куысты фæрцы Хуссар Ирыстоны адæмæн ис сабырад, æнцойад. Фидарæй мæ уырны, дарддæр дæр кæй кæндзыстут уæ адæмæн иузæрдион лæггад. Уыцы хъуыддаджы та уын уæ къух фæрог кæндзæнис ног автотранспорт. Мæ зæрдæ уын зæгъы, цæмæй æппынæдзух уат æнæфыдбылыз, не ‘мбæстæгты æнтыстджынæй хизат æвзæргæнджытæй, æмæ уæ Ног азы хорзæх уæд!», — загъта Президент.
Джиоты Алыксандр
