МИДХЪУЫДДÆГТЫ МИНИСТРАДÆН – НОГ СÆРГЪЛÆУУÆГ

Бæстæйы Президент Гаглойты Алан 9 июны Мидхъуыддæгты министрады сæргълæууæгæй снысан кодта милицийы булкъон Гæззаты Валери Таймуразы фырты. Уый фæдыл Президент фембæлд ведомствойы къухдариуæгадимæ æмæ семæ æрдзырдта дарддæры куысты фæдыл.

Бæстæйы сæргълæууæг стыр бузныджы ныхæстæ загъта раздæры Министр Пухаты Мерабæн æмæ æппæт коллективæн дæр сæ бакæнгæ куысты тыххæй, æмæ банысан кодта, зæгъгæ, кæд æмæ ныры онг бирæ æнтыстытæ уыд ведомствойæн, уæддæр хъæуы бирæ цыдæртæ фæхуыздæр кæнын.

«Сымахæн уæ куыст вазыгджын у, стыр бæрндзинад хæссут. Уæ куысты уын уæ удуæлдай архайды тыххæй стыр бузныг зæгъын. Уыимæ ма иумæ Мидхъуыддæгты министрады хаххыл ис хъæндзинæдтæ дæр, кæцыты хъæуы æвæстиатæй аиуварс кæнын. Ног снысангонд министрæн мæ зæрдæ зæгъы æнтыстджын куыст», – загъта Гаглойты Алан.

Гæззаты Валери райгуырдис Цхинвалы 1971 азы 30 марты. 1996 азы каст фæцис Воронежы паддзахадон университет æмæ 1997 азæй фæстæмæ службæ кæнын райдыдта мидхъуыддæгты органты. Бирæ азты дæргъы фæкуыста æндæр æмæ æндæр бæрнон бынæтты:

– вазыгджын уголовон хъуыддæгты раиртасыны хайады, хистæр слестгæнæнгæй,

– экономикон фыдракæндтæ раиртасыны къорды хистæр слестгæнæгæй,

– вазыгджын уголовон хъуыддæгты раиртасыны хайады сæргълæууæгæй,

– слестгæнæн управленийы сæрмагонд хъуыддæгты хистæр слестгæнæгæй,

– милицийы районон управленийы криминалон хайады сæргълæууæгæй,

– мидхъуыддæгты министрады хисæрмагонд æдасдзинады управленийы хистæры хæдивæгæй,

– 2015 азы та нысангонд æрцыд мидхъуыддæгты министрады хисæрмагонд æдасдзинады управленийы хистæрæй.

Йæ службæйон хæстæ иттæг хорз кæй æххæст кодта, уый тыххæй хорзæхджын æрцыд ведомствойон æмæ паддзахадон хорзæхтæй.

Джиоты Алыксандр