Дзæуджыхъæуы футболон клуб «Алани»-йы сæйраг тренерæй нысан æрцыд Гогниты Спартак. Афтæмæй командæйы хицæуттæ сæххæст кодтой спортуарзджыты фылдæр хайы домæн. Спартак ацы бынаты баивта Султан Тазабаев æмæ Бететы Сосланы.
Гогниты Спартак раздæр клубы тренировкæ кодта 2019 июлæй 2022 азы майы онг.
«Тынг æхсызгон мын у мæ уарзон клубмæ фæстæмæ æрбаздæхын. Абон ауагътам гъæдджын тренировкæ. Лæппутæ равдыстой хорз бæрæггæнæнтæ, сæ тырнындзинад. Уыдон æй æмбарынц, кæй хъæуы ноджы интенсивондæр æмæ агрессивондæр футбол æвдисын. Ахæм футбол цæуы нæ спортуарзджыты зæрдæмæ. Нæ физикон уавæр фæхуыздæр кæнын хъæуы æмæ ма ноджы бирæ хъуыддæгтыл бакусын хъæудзæн. Сæйрагдæр уый у, æмæ нæ лæппутæ тынг хорз цæттæ сты, ис сын стыр потенциал», – банысан кодта Гогниты Спартак.
Уый ма йæ ныхæстæм бафтыдта, зæгъгæ, хъæуы уæхскуæзæй бакусын. «Футболисттæй бирæтæ ацыдысты, бирæтæ та æрбацыдысты. Ног æрбацæуджытæй бирæтæ нæ зонынц мæ домæнтæ. Уымæ гæсгæ бахъæудзæн бирæ бакусын. Ныфс мæ ис, нæ фидæн хорз кæй уыдзæн, уымæй», – загъта уый.
ХУРИТЫ Батрадз
