Республикæйы Хицауады уæнгтæ æмæ муниципалитетты бæрнон кусджытæ сæ радон æмбырды се ‘ргом сæйрагдæр аздæхтой ног ахуыры азмæ цæттæ кæныны фарстатæм.
Æмбырды архайджытæ æрдзырдтой Беслæны фыццæгæм скъолайы арæзт террористон фыдракæндтимæ бастæй 1-3 сентябры номарæн мадзæлттæм цæттæдзинады фарстайыл. Республикæйы Сæргълæууæг Сергей Меняйло профилон ведомствæты разамонджытæн бафæдзæхста, цæмæй номарæн бонты рæстæг арæзт æрцæуой æдасдзинады уæлæмхасæн мадзæлттæ.
«Уымæй уæлдай, барадхъахъхъæнæг оргæнты минæвæртты уæлдай къæрцхъус уæвын хъæуы ног ахуыры азы райдайæн – 4 сентябры, стæй æппæт азы дæргъы дæр, цæмæй скъоладзаутæ æмæ ахуырадон-хъомыладон кусæндæттæ æдас уой алыхуызон æнæнхъæлæджы цаутæй. Кæй зæгъын æй хъæуы, фылдæр æргом здахын хъæуы, адæм фылдæргæйттæй кæм вæййынц, уыцы бынæттæм», – йæ раныхасы фæнысан кодта республикæйы разамонæг.
Ахуырады министр Алыбегты Эллæ куыд загъта, афтæмæй республикæйы ахуырадон уагдæттæ цæттæ сты ног ахуыры азмæ. «Цалдæр скъола байгом уыдзысты ног цалцæджы фæстæ. Фыццаг хатт скъолайы къæсæрæй цы сабитæ бахизой, уыдонæн Сæргълæууæджы уынаффæйæ, ракæндзысты зæрдылдарæн лæвæрттæ. Ног ахуыры азы райдайæны кадæн æмбырдтæ республикæйы скъолаты уыдзысты 4 сентябры, 1 – 3 сентябры та скъоладзаутæн сараздзысты сабырдзинады уроктæ», – банысан кодта Алыбегты Эллæ.
Дарддæр, министры ныхасмæ гæсгæ, ног ахуыры аз сног уыдзысты фæллойы, æдасдзинады æмæ Фыдыбæстæ хъахъхъæныны уроктæ. Раздæрау бынат нæ уыдзæн ныййарджытæй æхца æмбырд кæныны цаутæн. Ахæм хабары тыххæй æвæстиатæй фехъусын кæнын хъæудзæн Ахуырады министрады къантролы æмæ цæстдарды хайадмæ. Фæтк халджытæ цæудзысты æфхæрд. 2030 азмæ та æппæт ахуырадон уагдæттæ æрцæудзысты цалцæг.
Уыцы бон æмбырды архайджытæ Сергей Меняйлойы уынаффæмæ гæсгæ, сфидар кодтой ног уагæвæрд: нырæй фæстæмæ мыздæй уæлдай уæлæмхасæн фынддæс мины фыст цæудзæн æрыгон ахуыргæнджытæн, æртыккаг курсæй кусынмæ чи бацæуа, уыдонæн та – фæйнæ авд мин сомы. Уыдон хорз æххуыс сты, ахуыргæнæджы дæсныйады фыццаг къахдзæфтæ чи кæны, уыдонæн.
Нæ уацх.
