Уæрæсейы Федераци Республикæ Хуссар Ирыстоны хæдбардзинад куы банымадта, ууыл 16 азы сæххæсты сæраппонд нæ паддзахады тыхон структурæтæ иумæ ауагътой сæрмагонд ахуыртæ. Хайад дзы райстой Паддзахадон хъахъхъæнынады службæйы сæрмагонд къорд, Хъахъхъæнынады министрады сæрмагонд нысаны къорд, Паддзахадон æдасдзинады комитеты спецкъорд æмæ Мидхъуыддæгты министрады спецкъордтæ ОМОН æмæ СОБР.
Ахуыртæм бацыдысты бæстæйы Президент Гаглойты Алан, Хицауады сæрдар Джуссойты Константин, Парламенты сæрдар Мæргъиты Алан, генералон прокурор Собаты Григорий, Хъахъхъæнынады министр Сабанты Инал, Мидхъуыддæгты министр Гуыцмæзты Алан, тыхон структурæты минæвæрттæ æмæ ма æндæр бæрнон кусджытæ.
Сценаримæ гæсгæ паддзахадон арæнтæм «æрбабырста» знаджы диверсион-развæдсгарæн къорд, тох самадтой арæнхъахъ-хъæнджытимæ æмæ сæ иу хай бамбæхст хъæды. Тыхон структурæты спецкъордты раз сæвæрдтой хæс – баййафой знæгты æмæ сæ скуынæг кæной.
Ахуырты хайадисджытæ æрæвнæлдтой потенциалон ныхмæлæуджыты скуынæг кæнынмæ. Сæ уæлæ скодтой хæстон экипировкæ, райстой хæцæнгæрзтæ æмæ зынвадат фæндæгтыл сарæзтой марш-бросок 14 километры дæрддзæгмæ. Фыццаграды уал баиу кодтой сæ кæрæдзийы ‘хсæн радиобастдзинад, цæмæй сын æнцондæр уыдаид сæ архайд координаци кæнын. Уый фæстæ ацыдысты развæлгъау банысангонд маршрутыл. Фæндагыл сбæлвырд кодтой знаджы снайперты, сусæгæвæрд рæмудзæн æрмæджытæ, бакодтой фыццаг медицинон æххуыс, сарæзтой эвакуаци цæф хæстонæн. Кæронбæттæны сценаримæ гæсгæ знӕгтæ срæмыгътой хид æмæ хæстонты бахъуыд цæугæдоны сæрты ахизын. Райвæзтой бæндæн доны иннæ фарсмæ æмæ æд экипировкæ æмæ хæцæнгæрзтимæ, «хъазуатон тохы бацæугæйæ», рахызтысты доны иннæ фарсмæ.
Ахуырты хайадисджытæ равдыстой иттæг хорз тактикон æмæ физикон цæттæдзинад æмæ сæххæст кодтой сæ разылæууæг хæстæ. Президент æмæ иннæ уазджытæ дæр райгондæй баззадысты мадзалæй æмæ сын бузныджы ныхæстæ загътой. Сæ арæхстджын архайды тыххæй Паддзахадон хъахъхъæнынады службæйы сæргълæууæг Коцты Андрей алы дæлхайæ дæр цалдæр адæймаджы схорзæхджын кодта.
Ахæм ахуыртæ ахъаз сты тыхон структурæты æнгом архайдæн, сæ кæрæдзи хуыздæр æмбарынæн тыхст рæстæджы, сæ цæттæдзинад фæбæрзонддæр кæнынæн.
Нæ уацх.
