Хуссар Ирыстоны Сырх чиныджы автор, Хуссар Ирыстоны паддзахадон университеты биологийы кафедрæйы доцент, хъæдыхæдзарады сгуыхт кусæг, биологон зонæдты кандидат, нæ бæстæйы флорæ æмæ фаунæйы фæдыл бирæ зонадон куыстыты автор, дзæнæттаг Къæбулты Зауырыл 85 азы кæй сæххæст, Хуссар Ирыстоны флорæ æмæ фаунæйы Сырх чиныджы рацыдыл фондз азы æмæ хъæд хъахъхъæныны дунеон бон кæй уыдис, уымæ гæсгæ 5-æм астæуккаг скъолайы ауагъд æрцыд тымбыл фынг.

Мадзал бацæттæ кодтой хистæркъласонтæ сæ биологийы ахуыргæнæг Гæбæраты Екатеринæимæ. Хайад дзы райстой скъолайы ахуыргæнинæгтæ, ахуыргæнджытæ, Геологи, экологи æмæ æрдзæй пайда кæныны комитеты зайæгойтæ æмæ цæрæгойты дуне хъахъхъæныны фæдыл хайады хистæрГæззаты Юри, биологон зонæдты кандидат, Хуссар Ирыстоны Сырх чиныджы æмавтор Зауыры фырт Алан æмæ æндæр уазджытæ дæр.

Мадзалы ахуыргæнинæгтæ бæстонæй æрдзырдтой Къæбулы фырты цард æмæ зонадон архайдыл, Хуссар Ирыстоны Сырх чиныджы мидис æмæ нысаниуæгыл. Дзырдтой, Зауыр йæ куыстыл æнувыд кæй уыд, кæй архайдта зайæгойты дунейы сусæгдзинæдтæ рафæлгъауыныл.

Ахуыргæнинæгтæ ма сæ раныхæсты банысан кодтой, Зауыр кæй уыд йæ раттæг адæмы патриот. Сæ цин æмæ сæ хъыджы дæр æдзух сæ фарсмæ уыд, активон хайад иста нæ республикæйы хæдбардзинад райсыны. Уый стыр хайбавæрд бахаста нæ республикæйы флорæ æмæ фаунæ бахъахъхъæнынмæ.

Зауыр рæсугъд æмæ цымыдисон цард кæй фæкодта, уый банысан кодта Гæбæраты Екатеринæ дæр. «Йæ хъуыдытæ æдзухæй баст уыдысты зонадимæ, йæ райгуырæн бæстæимæ. Уый уыд йæ хъуыддаг зонæг. Йæ куыстытимæ йын зонгæ кодтой æмæ кæнынцканд Ирыстоны нæ, фæлæ уымæн æддейæ дæр. Уый æрмæст стыр ахуыргонд, нæ уыд, фæлæ ма хорз цардæмбал æмæ ныййарæг дæр», – загъта Гæбæраты чызг.

Мадзалы ма раныхас кодтой æмæ ахуыргæнингтæн Зауыры куысты тыххæй цымыдисон факттæ радзырдтой Гæззаты Юри æмæ ахуыргонды фырт Алан. Уыдон æрдзырдтой Хуссар Ирыстоны флорæ æмæ фаунæйы Сырх чиныджы арæзт æмæ нысаниуæджы тыххæй.

Ахуыргонды зонадон архайды, æрдз, хъæды рæсугъддзинады тыххæй йæ хъуыдытæ дзырдта скъолайы директор Туаты Мадинæ æмæ сывæллæттæн йæ фæдзæхст уыд, цæмæй аудой æрдзыл, хъахъхъæной йæ. Уымæн æмæ нæ алфæмблай æрдз, цахæм уа, уымæй бирæбæрцæй кæнгæ у адæймаджы æнæниздзинад.

Мадзалы ахуыргæнинæгтæ цы æмдзæвгæтæ кастысты, уыдон дæр баст уыдысты æрдзимæ, йæ рæсугъддзинадимæ.

Мадзал уыд цымыдисон æмæ ардæм æрбацæуджытæ баззадысты райгондæй. Йæ нысан уыд ахуыргæнинæгты ахуыргонды цард æмæ сфæлдыстадимæ базонгæ кæнын, йæ хайбавæрд биологи æмæ экологимæ цахæм уыд, уый сын бацамонын, арфдæр сæ базонгæ кæнын зайæгойтæ æмæ цæрæгойты дунеимæ.

Мадзалы кæрон ахуыргæнинæгтæн æмæ мадзалмæ æрбацæуджытæн балæвар кодтой зæрдылдарæн къæлиндартæ Хуссар Ирыстоны флорæ æмæ фаунæйы Сырх чиныгæй ист фондз цæрæгойы къамтимæ.

           БЕСТАУТЫ Валя

Comments are closed, but trackbacks and pingbacks are open.