Æрдз адæймаджы царды ахсджиаг бынат кæй ахсы, йе ‘нæниздзинадæн ын стыр пайда кæй у, уый хорз æмбарынц нæ горæты 5-æм астæуккаг скъолайы экологион клуб «Æнæниз фæлтæр»-ы уæнгтæ æмæ æрæджы 3-æм марты Дунеон хъæддаг æрдз бахъахъхъæныны дунеон боны цытæн ауагътой тымбыл фынг.
Мадзалы нысан уыд, ахуыргæнинæгты хъусдард нæ æрдзы рæсугъддзинадмæ аздахын, аудгæ ахаст æм дарын, нæ республикæйы флорæ æмæ фаунæйы стæм хуызтæ бахъахъхъæнынмæ ахуыргæнинæгты сразæнгард кæнын, «Республикæ Хуссар Ирыстоны Сырх чиныг»-ы мидисимæ сæ базонгæ кæнын æмæ ахуыргæнинæгты хайбавæрд æрдз бахъахъхъæнынмæ, рæзын кæнын.
Мадзалмæ æрбахуыдтой «Сырх Чиныджы» автор Къæбулты Зауыры, нæ горæты Ахуырады управленийы хистæр Лолаты Жаннæйы, йæ хæдивæг Гæбæраты Жаннæйы, Парламенты депутат, РХИ-йы адæмон ахуыргæнæг Уалыты Розæйы. Тымбыл фынджы хайад райстой скъолайы директор Туаты Мадинæ æмæ ахуыргæнджытæ дæр.
Мадзалмæ æрбацæуджытæн фадат уыдис, ахуыргæнинæгтæ æмæ мадзал организацигæнæг ахуыргæнджытимæ кæй бацæттæ кодтой, уыцы фотоæрмæджытимæ базонгæ уæвынæн. Къулыл ауыгъд телевизоры та фенæн уыд, нæ республикæйы рагуалдзæг цы алыгъуызон рæсугъд дидинджытæ рафтауынц, уыдоны къамтæ æмæ сæ ардæм æрбацæуджытæ истой æхцондзинад. Ацы бæрæгбонмæ ма уыдон бацæттæ кодтой календартæ, цыран мыхуыр æрцыдысты рагуалдзæджы стæм дидинджыты хуызистытæ æмæ сæ нæмттæ.
Экологион клуб «Æнæниз фæлтæр»-ы къухдариуæггæнæг РХИ-йы сгуыхт ахуыргæнæг Гæбæраты Екатеринæ æрдзырдта, Хуссар Ирыстоны Сырх чиныджы рацыд стыр ахъаз кæй у нæ рæсугъд æрдз уарзджытæн, скъолаты ахуыргæнинæгтæ, уæлдæр ахуыргæнæндæтты студенттæн, Ирыстоны æрдзмæ, йæ флорæ æмæ йын фаунæмæ чи цымыдис кæны, æппæт уыдонæн æмæ стыр бузныг загъта чиныджы авторæн йæ ахæм лæвары тыххæй. Гæбæраты Екатеринæ куыд загъта, афтæмæй йын стыр аргъ скодтой чиныджы презентацимæ Уæрæсейæ æрхонгæ уазджытæ дæр. Сæ цымыдисдзинад чиныгмæ аздæхтой Хуссар Ирыстоны ахуыргæндтæ æмæ æхсæнад дæр.
Гæбæраты Екатеринæ, æрдзы рæсугъддзинадыл дзургæйæ, банысан кодта, æрдзы хъæбысы фыццаг дидинджыты фæзынды рæстæджы кæй фæнысан кæнынц Сылгоймæгты дунеон бæрæгбон 8-æм март дæр. Уыцы рæстæджы та сылгоймæгты зæрдæ балхæныны тыххæй нæ бацауæрдынц уыцы дидинджытыл, фæтонынц сæ æнæауæрдонæй æмæ, зæгъгæ, уый раст нæу. Аудын хъæуы хъæдыл, дæттыл, афтæ ахсджиаг нын чи у, уыцы флорæ æмæ фаунæйыл.
Раныхас кодта «Сырх чиныджы» автор, Хуссар Ирыстоны университеты биологийы кафедрæйы доцент, хъæды хæдзарады сгуыхт кусæг, биологион зонæдты кандидат Къæбулты Зауыр дæр.
Зæгъын хъæуы уый, æмæ Зауыр стыр куыст бакодта «Сырх Чиныджы» рауагъдыл. Уый у уникалон чиныг. Уырдæм хаст æрцыдысты, чи сыстæм сты, Ирыстоны æрдзы уыцы цымыдисон зайæгойтæ. Чиныгыл кусджытæ уыцы зайæгойты хиæдтæ ахуыр кодтой 7 азы дæргъы.
Дарддæр кæстæр кълæсты ахуыргæнинæгтæ бакастысты æрдзимæ баст æмдзæвгæтæ.
Мадзалы ма кæстæркъласонты райстой «Раззагонты» рæнхъытæм æмæ сыл скъолайы ахуыргæнджытæ цытджын æгъдауæй бабастой галстуктæ. Фыццаг хатт сын хæсгонд æрцыд, цæмæй тæхгæ мæргътæн саразой хæдзæрттæ æмæ рауадзой Мæргъты бон банысан кæныны цытæн къулын газет.
Кæронбæттæны ахуыргæнинæгты цымыдисгæнæг фарстытæн бæстон дзуаппытæ радта Къæбулты Зауыр.
Тымбыл фынджы хайадисджытæн Хъæддаг æрдз хъахъхъæныны дунеон боны цы-тæн раарфæ кодта скъолайы директор Туаты Мадинæ. Æрæмбырдуæвджытæн йæ цæст бауарзта æнæниздзинад æмæ амондджын цард нæ рæсугъд æрдзы хъæбысы. Уæлдай зæрдæбын арфæтæ та ракодта мадзал организацигæнæг ахуыргæнджытæ Тедеты Ноннæ æмæ Гæбæраты Екатеринæйæн.
БЕСТАУТЫ Валя
Comments are closed, but trackbacks and pingbacks are open.