Сæрдыгон уæлæдарæсмæ рахизыны фæстиуæгæн мидхъуыддæгты министрады дæлхæйтты уагъд цæуынц басгæрстытæ рæнхъон скондæн. Ахæм басгæрстытæ уал уагъд æрцыдысты централон аппараты, æнæведомствойон хъахъхъæнынады управленийы, горæт Цхинвалы æмæ Ленингоры районы милицийы хайадты.
Цæмæй милицийы кусджыты уæлæдарæс хъæугæ домæнтæн дзуапп дæтта, се ‘ддаг бакаст уа æмбæлон, уый фæдыл дæлхæйтты хистæртæ лæмбынæг кастысты алцæмæдæр. Зæгъæм, пъагæттæ раст хуыд сты æви нæ, шевронтæн сæ бæлвырдгæнæнты рæстæг ацыдис æви нæ. Лæмбынæг фæкæсынц фыстытæм, цæмæй дзы рæдыд ма разына.
Ахæм басгæрстытæ милицийы дæлхæйтты уагъд фæцæуынц регуляронæй æмæ нымад сты æнæмæнгхъæуæгыл. Йæ фæрцы хуыздæр кæны рæнхъон ралæуды культурæ, фидардæр кæны дисциплинæ, æнгомдæр зонгæ кæнынц сæ разы лæууæг хæстимæ.
ДЖИОТЫ Алыксандр
