Нæ республикæйы бастдзинады монополист «Мегафон-Хуссар Ирыстоны»-ы компанийы ивгъуыд къуырийы фæхуыдтой Мыхуыр æмæ информацийы комитеты пресс-центрмæ. Уыдон хатдзæгтæ сарæзтой ацы азæн æмæ æрдзырдтой 2023 азы нывæзтытыл.
Компани «Мегафон-Хуссар Ирыстон»-ы коммерцион директор Санахъоты Ларисæ фехъусын кодта, 2023 азæй кæй æруромдзысты сæ бастдзинады лæггæдты картæтæ. Нырæй фæстæмæ абоненттæ сæ хыгъд баххæст кæнынæн пайда кæндзысты банкоматæй. «Цæмæй дæрддзæф хъæуты цæрджытæн фадат уа сæ хыгъдтыл фæрæзтæ сæвæрынæн, уый тыххæй скусын кæндзыстæм сæрмагонд проект „Мобилон офис“. Ныридæгæн мах фыстæджытæ арвыстам районты администрациты сæргълæуджытæм, цæмæй бацæттæ кæной хъæууон администрациты æмæ уыдон та фехъусын кæной, дæрддзæф хъæуты цæрджытæн фадат сын кæй уыдзæн мæй иу хатт сæ телефонты хыгъдтыл фæрæзтæ нывæрынæн.
Нæ специалисттæ цæттæ сты проекты фæлгæтты мæй иу хатт хъæуты азилынмæ æмæ цæрджыты домæнтæ æххæст кæнынмæ. Районты центрты ис компанийæн офистæ. Фæлæ „Мобилон офис“ æрымысыдыстæм сæрмагондæй дæрддзæф, хæххон хъæутæ æмæ ацæргæ адæмы тыххæй», — зæгъы Санахъоты Ларисæ.
Компанийы Æхсæнадимæ бастдзинады фæдыл специалист Бежанты Заринæ куыд загъта, афтæмæй ныртæккæ социалон хызæгты бирæ цъыфкалд цæуы «Мегафон-Хуссар Ирыстон»-ыл. Фæлæ цæмæдæр гæсгæ компанийы районты офистæм хъастгæнджытæ стæм хатт бацæуынц. Фылдæр хатт абонент нæ фембары, йæ смартфоны цы лæггæдтæ ис, уыдон. Мах, дам, сорганизаци кодтам цæугæ рабадтытæ районты хъæутæм, цыран лæмбынæг æмбарын кæнæм нæ лæггæдты тыххæй.
«Мегафон-Хуссар Ирыстон»-ы генералон директор Николай Фрисов та дзырдта компанийы лæггæдты гъæд фæхуыздæр кæныны фæдыл. «Ныртæккæ дунейы иууыл стырдæр компанитæ æмæ мобилон бастдзинады оператортæ дæр кусынц æмæ архайынц сæ бастдзинады ног æмвæзадмæ скæныныл. Цæмæй абоненттæ зындзинæдтæ ма æнкъарой, уый тыххæй хъæуы ног ифтонгæдтæ сæвæрын. Мах æппынæдзух ивын хъæуы базæйон станцтæ, ног бынæтты монтаж кæнын, цæмæй бастдзинады къуыхцыдзинæдтæ ма æнкъарой дæрддзæф хъæуты цæрджытæ. Ног базæйон станц монтажкæныныл кусæм Ленингоры районы æмæ куыддæр куыстытæ конд фæуой, афтæ уым фæхуыздæр уыдзæн бастдзинад. Мобилон оператор фæстаг хатт цы цалдæр тарифон пълан æмæ опцийыл бакуыста, уыдон сты æнцон архайд. Зæгъæм, тарифон план-таблицæ S абоненттæн фадат дæтты 350 минуты æнæаргъæй ныхас кæнынæн. „Мегафон-Хуссар Ирыстон“-ы хызæджы тарифон пълæнттæй иууыл зынаргъдæр тариф у XXI, уымæн йæ аргъ у 2 500 сомы. Фæлæ ацы тариф абонентæн лæвар кæны 200 æнæаргъ минуты, 20 гб та — интернет трафик».
Компанийы генералон директор ма дзырдта, цалынмæ тарифон ног линейкæтæ нæ рауадзынц, уæдмæ уыцы пакетыл дзæвгар куыст кæй æрцæуы, кæй сыл саразынц тестон фæлварæнтæ. Фæстаг рæстæджы специалисттæ цы ног линейкæйыл бакуыстой, уыдонмæ уыд индивидуалон ахаст. Куыд хуыздæр, куыд æнцонвадатдæр уыдзæн абонентæн, ууыл архайдтой. Зæгъæм, иууыл егъаудæр пакет у тариф «Максимальный». Лæвæрд ын цæуы 50 гб интернет æмæ 200 минуты хызæджы дзурынæн. Тариф «Цифровой» та у æнæлимитон. Бахизæн дзы ис мессенджер æмæ социалон хызæгтæм. Афтæ ма абоненттæн дæтдзæн 15 гб интернет трафик æмæ 100 минут хызæджы мидæг дзурынæн.
Уый ма компанийы номæй хатыр ракуырдта абоненттæй, хатт Кавказы филиалы биллингон системæйы аххосæй аваритæ кæй æрцæуы, æмæ цалынмæ локализацигонд æрцæуынц, уæдмæ информацион технологитæй кæй фæиппæрд вæййынц. Уый тыххæй, «Мегафон-Хуссар Ирыстон»-ы сарæзтам мидадминистративон хайад, кæцы кусдзæн инциденттæ ма æруадзыныл. Абоненттæн та сæ бон у «тæвд линимæ» фæдзурын «500» номырмæ, кæцы сдзуапп кæндзæн цымыдисгæнæг фарстатæн.
Николай Фрисов ма дзырдта: «Мах регуляронæй уынаффæ кæнæм нæ уæрæсейаг коллегæтимæ, цæмæй „Мегафон-Хуссар Ирыстон“-ы интернет æмæ мобилон бастдзинады лæггæдты фæдыл тарифон опцитæ æмæ лæггæдты гъæд уой нырыккон æмвæзадыл. Кæй зæгъын æй хъæуы, мах хынцæм, цæрджытæн сæ бон стыр аргъ фидын кæй нæу. Ацы фарст аскъуыддзаг кæнынмæ здæхт сты махæн дæр нæ архайдтытæ. Ахæм позици ис „Мегафон-Хуссар Ирыстон“-ы директорты советы сконды, Хуссар Ирыстоны Бастдзинады комитеты сæргълæууæг Джиголаты Хасанæн дæр. Уый хъуыды дæр у, цæмæй лæггæдты гъæд æмæ тарифтæ кæрæдзийæн дзуапп дæдтой. Ифтонгады æргътæ та уыйбæрц схызтысты æмæ тарифтыл æнæ схæцгæйæ кусын нæ бафæраздзыстæм».
Фрисов дзырдта, «Мегафон-Хуссар Ирыстон» цы социалон проекттыл кусы, уыдоныл дæр. Æрвылаз компанийы æххуысы фæрцы хуссарирыстойнаг спортсментæ хайад райсынц æхсæнадæмон ерысты. Сæрмагонд æххуыс райстой, Украинæйы хæсты хайад чи исы нæ лæппутæй, уыдонæн дæр. «Мегафон-Хуссар Ирыстон» бацæттæ кодта ноджы цалдæр социалон проекты 2023 азмæ. Уыдоныл сæ рагацау дзурын нæ бафæндыд, фæлæ зæгъынц, зæгъгæ, реализаци куыд цæуой, афтæ сæ хъусын кæндзысты журналистты фæрцы.
Уазæгты Марфа
