23 июлы Хуссар Ирыстон банысан кодта национ информацион фæрæзты профессионалон бон. Бæрæгбоны цытæн Парламенты сæрдар Мæргъиты Алан дзыллон информацийы фæрæзты минæвæрттæй цалдæры схорзæхджын кодта РХИ-йы Парламенты Кады грамотæтæй. Депутатты æмæ йæхи номæй раарфæ кодта информацион фæрæзты æппæт минæвæрттæн, банысан сын кодта сæ куысты ахсджиагдзинад.
«Сымахæн æмæ информацион фæрæзты æппæт кусджытæн мæ фæнды раарфæ кæнын уæ профессионалон бæрæгбон – Дзыллон информацийы фæрæзты кусæджы боны цытæн. Мах æй иууылдæр æмбарæм, нæ республикæ, нæ адæм уæззау уавæры куы уыдысты, уыцы рæстæджыты Хуссар Ирыстоны дзыллон информацийы фæрæзты минæвæртты æгæрон куыст. Уыдон æппæтдæр сарæзтой информацион блокадæ атоныны тыххæй. Нæ журналистты куысты руаджы дунеон æмæхсæнад базыдта, нæ республикæйы цы цаутæ цыд, уыдон. Уыцы хъуыддаг ферох кæныны бар нын нæй. Сæрмагондæй мæ фæнды зæгъын информацион фæрæзты ветеранты тыххæй. Уыдон дæргъвæтин рæстæджы куыстой информацион фæрæзты фадыджы æмæ дарддæр дæр кусынц. Мæ сæрæй уын ныллæг кувын. Уе ‘рвылбонон куысты фæрцы республикæйы цæрджытæ райсынц раст, объективон информаци. Кæй зæгъын æй хъæуы, уæ куыст тынг ахсджиаг æмæ бæрнон у, æмæ нæ нæ къух куыд амона, афтæ æмбæлон хъусдард уыдзæн æмæ разæнгард кæндзыстæм, се ‘рвылбонон куыстæй нысаниуæгджын хайбавæрд чи хæссы, нæ уыцы коллегæты», – банысан кодта Парламенты спикер.
Национ политикæ, культурæ, дин æмæ дзыллон информацийы фæрæз-ты фæдыл парламентон комитеты сæрдар Хубежты Руслан дæр арфæйы æмæ бузныджы ныхæстæ загъта информацийы фæрæзты кусджытæн сæ профессионалон бæрæгбоны цытæн.
«Абон уæ адресыл цы арфæйы ныхæстæ загъдæуыд, уыдонимæ æз дæр разы дæн. Уæ куыст ахадæн у æмæ профессионалондзинад домы. Мæ зæрдæ уын зæгъы дарддæр дæр æнтыстджын куыст», – загъта Хубежты Руслан.
Республикæ Хуссар Ирыстоны Журналистты цæдисы Сæрдар Харебаты Батрадз дæр сæ профессионалон бæрæгбоны цытæн раарфæ кодта йæ коллегæтæн, банысан кодта, Хуссар Ирыстоны информацион фæрæзтæ бæрæгбон нысан кæнын куыд æмæ кæдæй райдыдтой, уый дæр.
«Хуссар Ирыстоны Информаци æмæ мыхуыры министрады кусгæйæ, сæвзæрд фарст журналистты профессионалон бæрæгбон снысан кæныны тыххæй. Бирæ фæндæттæ уыд, фæлæ Гæбæраты Юрийы фæндонмæ гæсгæ, дзыллон информацийы фæрæзты профессионалон бæрæгбон нысан кæнын райдыдтам, фыццаг ирон газет – «Ирон газет» кæд рацыд, уыцы бон, ома, 23 июлы. Ацы боны цытæн арфæ кæнын æрæмбырдуæвджытæн. Уæ дарддæры куысты уын мæ зæрдæ зæгъы æнтыстджын куыст», – загъта Харебаты Батрадз.
Уый фæстæ журналистикæйы фадыджы стыр æнтыстыты, Хуссар Ирыстоны æрцæугæ цауты объективонæй æвдисыны æмæ Дзыллон информацийы фæрæзты кусæджы бæрæгбоны цытæн Мæргъиты Алан Республикæ Хуссар Ирыстоны Парламенты Кады грамотæтæй схорзæхджын кодта газет «Хурзæрин»-ы æхсæнадон-политикон хайады редактор Осиаты Индирæйы, газет «Южная Осетия»-йы æхсæнадон-политикон хайады редактор Биазырты Мадинæ æмæ газеты уацхæссæг Хъæцмæзты Зæринæйы.
Тележурналистикæйы фадыджы бирæазон куысты, æрвылбонон телеалæвæрд «Парламентский час»-ы гъæдджын æмæ профессионалонæй цæттæ кæныны тыххæй Парламенты Кады грамотæйæ хорзæхджын æрцыд ПТРК «Ир»-ы режиссеры ассистент Тедеты Лали. Парламенты куыст объективонæй кæй æвдисы, уый тыххæй Кады грамотæйæ схорзæхджын кодтой РХИ-йы Парламенты информацион-аналитикон управ-ленийы консультант Хуыбиаты Зæринæйы.
Мæргъиты Алан ма раарфæ кодта Парламенты информацион-аналитикон управленийы сæргълæууæджы хæдивæг Джиоты Валентинæ æмæ информацион-аналитикон управленийы консультант Гаглойты Ацæмæзæн, «Республикæ Хуссар Ирыстоны сгуыхт журналист»-ы ном сын кæй радтой, уый тыххæй.
Осиаты Индирæ
