Ныртæккæ æнæхъæн дунейыл цы диссæгтæ цæуы, уыдон адæмы сæ иугъæдон цардæй фæиппæрд кодтой. Цы кæнын хъæуы, кæм ис сайд æмæ æцæгдзинад, уый ничиуал зоны æмæ сдызæрдыг сты. Ахæм рæстæджы та куыд вæййы, афтæ сарæх сты дам-думтæ. Дзыллон хабархæссæг фæрæзты æнæофициалон гуырæнтæ сидынц адæммæ, цæмæй сайды ма бахауой, мæнг вирусы уæвынадыл ма æууæндой. Æмæ куы иу ран, куы иннæ ран сгуыпп кæнынц митингтæ. Хуыцаубоны ахæм митинг уыд Дыгуры районы, ныр йæ активисттæ дзуапп дæттынц барадхъахъхъæнджыты раз. Цалдæр адæймаджы бафæлвæрдтой Тагъд æххуысы клиникон рынчындонмæ бабырсын, цæмæй сæхи цæстæй феной, рынчынтæ дзы ис æви нæй æмæ сæ пъæлицæ ныппырх кодта. Ныр та сидынц республикæ-йы цæрджытæм, цæмæй 20 апрелы митинг-мæ рацæуой. Рагагъоммæ бæрæггæнæн-тæм гæсгæ митингмæ цæттæ сты мин адæй-магæй фылдæр. Уыдоны нæ уырны, низ æмæ лозунг «Граждане СССР»-ы бын хицауадæй бадомдзысты адæмы ма сайын æмæ сын сæ раздæры бартæ раздахын. Фæлæ та мæнмæ гæсгæ уый дæр нæ бафтдзæн организаторты къухы. Цы хъуыды кæны, уый зæгъыныл архайы не ‘мзæххон, петербургаг зарæггæнæг Чельдыты Вадим æмæ йæм се ‘ргом раздæхтой слестгæнæг органтæ. Тагъд æй дзуапп радтын бахъæудзæн.
Бæлвырд у иу хъуыддаг: амынд рынчындоны рынчынтæ ис, фæлæ хъуыддаг уый мидæг ис, æмæ цæмæй рынчын сты? Бæрæг куыд у, афтæмæй пневмони æмæ гриппæй рынчынты дæр схуыссын кæнынц уым, ома сæ сбæрæг кæнæм, коронавирус сæм ис æви нæ. Фæлæ иу адæймаг дæр йæ анализты фæстиуджытæ нæма федта, афтæмæй рынчындон йедзаг кæны. Чи дзы хуыссы, уыдонæй иуы хиуæттæ куыд загътой, афтæмæй сæ рынчын уæззау пневмонияйæ рагæй хъæрзы, ныр дæр уыцы низимæ бахауд. Дохтыртæ куыд загътой, афтæмæй йæм «коронайы» вирус хъуамæ сбæлвырд кæной, афтæмæй йын йæ анализты дзуаппытæ нæ уынын кæнынц, æддæмæ йæ нæ уадзынц, мидæмæ йæм никæй уадзынц. Æмæ ахæмтæ тынг бирæ сты.
Цы уавæр сæвзæрд, уый тыххæй нæ ахуыргæндтæй дæр бирæтæ зæгъынц сæ хъуыдытæ. Историк æмæ политолог Хъойбайты Барис æмæ политолог Мамиаты Алан куыд нымайыц, афтæмæй адæм бафæлладысты вазыгджын социалон-экономикон уавæрæй, нæ сæм хæццæ кæны бæлвырд информаци æмæ хъусынц дам-думтæм, нал сæ уырны вирусы уæвынад. Ахуыргæндты хъуыдымæ гæсгæ хицауад адæмимæ æнгомæй нæ архайы, уымæ гæсгæ сдызæрдыг сты, раст ныхасыл дæр ничиуал æууæнды.
Йæхи хатдзæгтæ æрхаста интернет-сайт «Основа» дæр. Журналист Тохсырты Вадим фыссы: «Адæм протесты зæрдыл кæй сты, уымæн бирæ аххосæгтæ ис. Иуæй – мæгуыр, уæззау финансон уавæр. Чысыл бизнес, кæцы уыд мингай бинонтæ дарæг, сæфты къахыл ныллæууыд, кæдæй нырмæ æхгæдæй лæууынц дуканитæ, хæрæндæттæ, æрмадзтæ æмæ æндæртæ.
Иннæмæй – адæмы интеллектуалон æмвæзад. Нæдæр цы цæуы, уый æмбарынц, нæдæр сын æй амонæг ис. Стыхстысты алы карз мадзæлттæй адæм, нæй сын кусæн, улæфæн, рынчынтимæ бастдзинад æмæ æбæрæг уавæрæй стыхстысты.
Дзырд дæр ыл нæй, уый у республикæйы разамындæн стыр фæлварæн, уымæн æмæ ахæм уавæрты кусынмæ цæттæ ничи уыд».
Æмткæй аналитикты хъуыдытæ куы сисай, уæд сæ хатдзæг у ахæм: Уæрæсейы Президент адæмæй иуцасдæр ахибар, баззадысты регионтæ иунæгæй сæ лыггæнинаг фарстатимæ. Регионты сæргълæуджытæй та алкæй бон нæ бацис уавæр бамбарын кæнын, адæмимæ хъæугæ ныхæстæ ссарын…
Ныр та уал… Ныр та уал æхгæдæй лæууынц куыстуæтты фылдæр хай. Зæгъæн ис, ахуыры азы фылдæр хай скъолатæ нæ кусынц æмæ сывæллæтты ахуыры æмвæзад ныллæгдæр кæны. Ахуыргæнджытæ хъизæмар кæнынц, сæ цæстытæ фехæлдысты телефонтæй уроктæ амонынæй, адæмы зиæнттæм цæуын нал уадзынц, фæндæгтæ куы иу ран, куы иннæ ран æрæхгæнынц …
Хорз уаид, алчидæр куы бацархаид, цæмæй «Коронайæ» уæлдай грипп æмæ пневмонийæ дæр ма фæрынчын уа…
Нæ уацх.
Comments are closed, but trackbacks and pingbacks are open.