Æрæджы Дзæуджыхъæуы Национ зонадон библиотекæйы йæ радон æмбырд ауагъта Кавказаг фысджыты клуб. Мадзалмæ æрбацыдысты сыхаг республикæты зындгонд фысджытæ, поэттæ, тæлмацгæнджытæ, журналисттæ… Фембæлды сæйраг нысан уыд Хетæгкаты Къостайы райгуырдыл 165 азы æмæ Беслæны трагедийыл 20 азы сæххæсты кадæн, стæй клубмæ ног уæнгтæ райсыны тыххæй.
Фембæлд байгом кодта æмæ амыдта журнал «Мах дуг»-ы сæйраг редактор, Кавказаг Фысджыты клубы регионалон хайады сæрдар Хетæгкаты Оксанæ æмæ бæлвырд радзырдта клубы куысты æмæ нысанты тыххæй. «Кавказы алы адæмтæ фыссынц алы темæтыл, фæлæ сæ апп у иу: райгуырæн бæстæйы уарзын æмæ йын лæггад кæнын, уыцы уарзт та се сфæлдыстады равдисын. Литературæ – стыр иугæнæг тых, кæцы амоны иудзинадмæ. Мах абон исæм клубмæ ног уæнгты. Уыдон сты куыд æрыгæттæ, афтæ зындгонд фысджытæ дæр Цæгат æмæ Хуссар Ирыстонæй, кæцытæ стыр æвæрæн ба-хастой ирон литературæмæ. Дарддæр цæудзæн уыцы куыст».
Уый фæстæ ныхасы бар радта Клубы сæрдар, дагестайнаг зындгонд фыссæг Миясат Муслимовайæн. Уый арфæ ракодта клубы уæнгтæн æмæ бæстон радзырдта Кавказаг фысджыты ‘хсæн литературон бастдзинæдты тыххæй. Кæрæдзийы уацмыстæ чи рауагъта æмæ чи тæлмац кæны, кæмыты уыди æмæ уыдзæн клубы уæнгты фембæлд, цавæртæ сты фидæны плантæ æмæ æндæртæ. Муслимова æрлæууыд хицæн фысджыты уацмыстæ æвзарыныл дæр. «Æз кæддæр цыдтæн Дзæуджыхъæуы уынгты, æмæ мæ бирæтæ базыдтой мæ чингуытæй, телеуынынады фæрцы. Баурæдтой-иу мæ æмæ мын арфæтæ кодтой, мæ уацмыстæй æппæлыдысты. Æз Ирыстоны хуызæн чиныгуарзаг адæм никуы федтон. Ахæмтыл лæууы литературæйы фидæн. Чиныгкæсæг куынæ уа, уæд фыссæг кæмæн фыссы», – дзырдта Муслимова. Уый ма йæ хъуыдытæ радзырдта Беслæны трагедийы тыххæй дæр: «Æз ныффыстон уыцы трагедийыл æнæхъæн чиныг. Ныртæккæ йæ тæлмац кæнынц алы æвзæгтæм. Æз уыдон фыстон уый тыххæй æмæ мæ уды рыст æмæ хъыгтæ зæгъон, æмдзæвгæты хуызы сæ чиныгкæсæгмæ рахæссон, кæннод мæ зæрдæ атыдтаид». Уый фæстæ Муслимова бакаст цалдæр æмдзæвгæйы.
Æмгуыстады æмæ литературон бастдзинæдты тыххæй сæ хъуыдытæ загътой Цæгат Ирыстоны Фысджыты цæдисы сæрдар Хозиты Барис, Хицауады аппараты консультант Бигъуылаты Людмилæ, Иры Стыр Ныхасы сæрдары хæдивæг Зæгъойты Вячеслав, амалхъом Мæрзойты Тамерлан, газет «Северная Осетия»-йы сæйраг редактор Битарты Маринæ.
Уазджытæй: Цæцæны адæмон поэт, Кавказы Фысджыты клубы уæнг Асламбек Тугузов, Цæцæны Афицерты цæдисы разамонæг, булкъон, Уæрæсейы Фысджыты цæдисы уæнг Мовла Гайраханов, йæ хæдивæг Муса Бисиев; черкесаг фыссджытæ: филолог Фарида Кудаева, Оксана Бовакова, Руслан Атабаев; кæсæгæй: лингвист æмæ фольклориртасæг Сеталий Казанов, поэт, филолог Фатима Маржохова æмæ иннæтæ. Раныхасгæнджытæ ма бакастысты се ‘мдзæвгæтæ, сæ уацмыстæй скъуыддзæгтæ. Дзырдтой ма, Къостайы æмдзæвгæтæй йæхи æвзагмæ чи æмæ цал ратæлмац кодта, уый тыххæй сæм йæ юбилейон мадзæлттæм цавæр плантæ ис æмæ афтæ дарддæр.
Мадзалы кæрон Кавказаг фысджыты клубмæ райстой ног уæнгты: фысджытæ Гæбæраты Юрийы, Годжыцаты Георгийы, Цæриаты Валерийы, Дыгъуызты Зæлинæйы, Геккиты Сосланы æмæ Гасанты Валерийы.
Уырны нæ, ацы проект суыдзæн традици, кæцы иу кæндзæн Кавказы алы адæмыхæттыты. Уымæн æмæ литературæ у иугæнæг тых.
ДЖУСОЙТЫ Нинæ
