Традицион ссис музейон фонд, РХИ-йы Президент Бибылты Анатолийæн йæ кусæгон балцыты рæстæджы кæй балæвар кæнынц, уыцы алыгъуызон дзаумæттæй баххæст кæнын.
Радон хатт та Президенты Администраци музеймæ радта РХИ-йы Президент Донецкы Адæмон Республикæйæ кæй æрласта, уыцы оригиналон сувенирты. Уыцы лæвæрттæй сæ иу у снарядтæн тухгæ лагъз, цыран æрæмбырд кодтой æхсæг хæцæнгарзы гилдзытæ. Уый аккаг бынат ссардта музейы президентон хайады къулыл. Иннæ экспонат – авангардон стъолы лампæ, кæцы арæзт у змæлынгæнæджы хæйттæй, æвæрд у хайады центры.
«Президент бын æрæвæрдта диссаджы традицийæн æмæ йын æххуыс кæны, уый тыххæй йын бузныджы ныхæстæ дзурын музейы æппæт коллективы номæй. Алкæцы ног экспонатæн дæр ис йæхи истори. Зæгъæм, фæстаг лæвæрттæ Бибылты Анатолийæн бакодтой «Ночные волки». Дыууæ экспонаты дæр сты ирд цæвиттон сæ рæстæгæн, уыдон æвдисынц Донецкы Адæмон Республикæйы реалитæ, кæцыйæн, хъыгагæн, хæсты темæ у актуалон. Стыр хъуыдыимæ æмæ фантазиимæ арæзт сувениртæ расайдзысты стыр цымыдисдзинад», – банысан кодта музейы директор Зассеты Мераб.
Музейæн ноджы иу лæвар ссис РХИ æмæ РЦИ-Аланийы сгуыхт нывгæнæг Къацты Вадимы масштабон куыст – триптих «Реквием». Музейæн Президенты Администрацийы ратгæ кæттæгтæ бынат бацахстой дыккаг уæладзыджы æппынæдзухон экспозицийы. «Уыдон сты музейæн аккаг лæвæрттæ. Æнæдызæрдыгæй, стыр курдиатимæ фыст æмæ нæ кадджын фыдæл Ос-Бæгъатыры номимæ баст ныв, йæхимæ аздахдзæн публикæйы стыр хъусдард», – банысан кодта музейы директор.
Тменаты Аннæ
Comments are closed, but trackbacks and pingbacks are open.