Къостайы цытæн – турнир шашкæтæй

Гениалон фыссæг Хетæгкаты Къостайы райгуырдыл 160 азы сæххæсты цытæн Цхинвалы райдыдта дунеон турнир шашкæтæй.

Ерыстæ сорганизаци кодтой РХИ-йы Фæсивæдон политикæ, спорт æмæ туризмы комитет, уæлдæр спортивон дæсныйады скъола æмæ шашкæты федераци. Сæ цæттæдзинад дзы фæлвæрдтой куыд Хуссар Ирыстоны, афтæ Цæгат Кавказы регионты минæ-вæрттæ. Уыдоны ‘хсæн сты Цæгат Ирыстон-Алани, Кæсæг Балхъар,  Дагъыстан æмæ Стъараполы крайы минæвæрттæ. Уыдонæй бирæтæ  фыццаг хатт не ‘рцыдысты Цхинвалмæ. «Æз ныр дыккаг хатт хайад исын ацы ерысты. Фарон ныл тынг хорз сæмбæлдысты. Æмæ та ныр дæр тынг æхсызго-нимæ æрцыдтæн. Тынг цæуы мæ зæрдæмæ Цхинвалы», –  загъта йæ хъуыдытæ Кæсæг-Балхъары минæвар Феликс Ахаминов.

Турнир официалонæй байгом кæныны церемонийы раныхас кодта шаш-кæты федерацийы президент Лолоты Барис. Ерысты хайадисджытæн ма раарфæ кодта Ирыстоны Фысджыты цæдисы æмсæрдар Хъазиты Мелитон.

Турнирмæ сæрмагондæй æрцыд Стъараполы крайы минæвар Анатолий Альникин. Уый цæры Пятигорскы Хетæгкаты Къостайы уынджы. Альни-кин бакаст Къостайы фыст æмдзæвгæ.  Ацы ерысты сæраппонд æмдзæвгæ ныффыста беслæйнаг Озиты Сергей.  

Уый фæстæ та Хетæгкаты Къостайы, Икъаты Владимиры, Чехойты Оляйы æмæ Гæбулты Мелитоны фыст æмдзæвгæтæ бакастысты 6-æм астæуккаг скъолайы ахуырдзаутæ. Уыдон бацæттæ кодта ирон æвзаг æмæ литературæйы ахуыргæнæг Дыгъуызты Лианæ. Хонгæ кафт та сæххæст кодтой Асаты Никъалайы хъомылгæнинæгтæ.

Уый фæстæ райдыдтой тохтæ. Турнир цыд швейцариаг системæмæ гæсгæ. Турниры фæстиуджытæм гæсгæ фыццаг бынат бацахста Роберт Мирзоян (Стъараполы край), дыккаг ссис Анатолий Альникин (Стъараполы край) æмæ æртыккааг бынат та бацахста Зæгъойты Павел.

Уыдон хорзæхджын æрцыдысты зæрдылдарæн лæвæрттæ, æхцайы премитæ æмæ майдантæй.

ХУРИТЫ Батрадз