Географийы къабазы Ирыстоны бирæ ахуыргæндтæ нæй. Фæлæ дзы чи ис, уыдон ацы зонадмæ стыр бавæрæн бахастой. Уыдонæй иу уыд зындгонд ахуыргонд-географ, зонæдты доктор, ЦИПУ-йы профессор Беруаты Барис. Ацы ахуыргонд йæ цард снывонд кодта Ирыстоны æрдз æмæ хæхты сахуыр кæнынæн, туризмы рæзтæн. Уый фæдыл ын йæ мидисджын æрмæджытæ газетты фæрстыл адæм æхсызгонæй кастысты. Ацы къабазмæ бахаста бирæ ногдзинæдтæ, ныффыста 800 зонадон куысты бæрц.
Географион æхсæнад сфæнд кодта ахæм ахуыргонды ном сæнусон кæнын. Уый тыххæй та хуыздæрыл банымадтой йæ ном ын искæцы хохæн радтын. Уый тыххæй равзæрстой Хъазыбег æмæ Джимарайы хæхты ʻхсæн цы æнæном бæрзæндтæ ис, уыдонæй иу. Уымæн йæ бæрзæнд у æртæ мин æмæ фондзсæдæ метры бæрц
Æнæном хохæн ахуыргонды ном радтыны тыххæй хъуамæ схъæлæс кæной уым æввахс хъæутæ Цми, Бæлта æмæ дыккаг Реданты цæрджытæ. Фаг хъæлæстæ райсыны фæстæ, хохы ном официалон уагæй схондзысты «Борис Бероев». Географион æхсæнады уæнгтæ куыд зæгъынц, афтæмæй уый у арфæйаг хъуыддаг ахæм ахуыргонды ном сæнусон кæнынæн, уый тыххæй та бюджетыл ницы уæз æрцæудзæн.
АДÆМЫ ÆНÆНИЗДЗИНАДÆН
Куыд зонæм, афтæмæй ацы аз февралы республикæйы кусын райдыдтой цæугæ медицинон 10 комплексы. Уыдон уæрст æрцыдысты муниципалитетты рынчындæттæ æмæ поликлиникæтыл. Уыцы техникон фæрæзты фæрцы, æххæстгонд цæуынц дзыллон диспансеризаци æмæ адæмы хицæн къордты æнæниздзинады уавæр раиртасыны мадзæлттæ. Уыимæ, куыд нысангонд цæуы, афтæмæй медицинон комплекстæ фылдæр æрвыст æрцыдысты дæрддзæф хъæутæм. Уымæй стыр удæнцой скодтой адæмæн, кæцытæн сæ бон се ʻнæниздзинад æмæ сæ уавæртæм гæсгæ, сæ бон нæу горæтмæ дохтыртæм æрбацæуын.
Æрæджы ма ацы цæугæ медицинон комплекстыл бафтыд ноджыдæр æртæ. Æнæниздзинад хъахъхъæнынады министр Тебиаты Сослан куыд фехъусын кодта, афтæмæй амынд техникæ балхæныны тыххæй сæрмагонд бадзырд бафыстой УФ-йы Сæудæджерад æмæ базарады министрадимæ.
Медицинон комплекстæ сты æртыгай машинæтæй. Иуыл дзы сты дохтыртæ, иннæуыл – медицинон техникæ, æртыккагыл – анализтæ исæн лабаратори. Медицинон æххуыс райсæн дзы ис терапевтæй, неврологæй, цæсты дохтырæй, урологæй, гинекологæй, стамотологæй. Ис ма сæ фелсырон-акушерон пункттæ, стæй УЗИ саразæн.
Нырмæ уал алы хъæуты цы медицинон комплекстæ куыстой, уыдоны руаджы æххуыс райстой ссæдз минмæ æввахс адæймаджы. Амынд министрадæй куыд фехъусын кодтой, афтæмæй ма ацы комплекстыл тагъд рæстæджы ноджыдæр бафтдзæн.
Нæ уацх.
