Паддзахадон куыстуат «Водоканал»-ы кусджытæ ацы бонты сты æнæвдæлон, архайынц 2018-19 азты Хуссар Ирыстоны социалон-экономикон рæзтæн ахъазгæнæг Инвестицион программæйы фæлгæтты арæзтцæуæг объекттыл. Ивынц, нæ горæты арæзтцæуæг фæрсаг уынгты зæххы бын цы доны хæтæлтæ цæуы, уыдон. Стæй иугонд æрцæудзысты централон сæйраг хаххмæ. Ныртæккæ уал ахæм куыстытæ æххæст кæнынц Плиты Харитоны уынджы бирæуæладзыгон хæдзæртты раз, Чиайы фырты, Нарты æмæ Дзугайы фырты уынгтыл. Уый фæстæ ахиздзысты нывæзтмæ гæсгæ сæм цы уынгтæ ис, уыдонмæ. Инженерон коммуникацитæ арæзт куы фæуой, уый фæстæ сæ сасфальт кæндзысты «Дорэкспострой»-ы кусджытæ.
Мах бацымыдис кодтам, ахæм инженерон-коммуникацион куыстытæ республикæйы æндæр районты дæр арæзт цæуы æви нæ, уымæ. Арæзтад, архитектурæ æмæ цæрæнуатон-коммуналон хæдзарады министры хæдивæг Гаглойты Сергей куыд зæгъы, афтæмæй «Цхинвалы уынгтæй дарддæр ацы аз схæрзарæзт кæндзысты горæт Къуайсайы Хетæгкаты Къостайы, Ленины, Гагарины æмæ Комаровы уынгтæ. Ленингоры та Сталины æмæ Къудухты Бесикы уынгтæ, стæй Сæрибары фæзуат. Уымæй уæлдай, Ленингоры абонентты баиу кæндзысты инженерон хызæгтæм. Цалцæг ма æрцæудзæни, Гуфтайæ-Къуайсамæ цы фæндаг цæуы, уый, стæй. Цъинагайрæгтæ рагæй кæмæ æнхъæлмæ кæсынц, уыцы фæндаг, дæр, ома,Гром-Цъинагары фæндаг дæр азы кæронмæ хъуамæ арæзт фæуа. Кусджытæ æмæ сæм сæрмагонд техникæ фаг ис, уымæ гæсгæ ницы цæлхдуртæ ис нæ разы».
Уазæгты М.
Comments are closed, but trackbacks and pingbacks are open.