Ленингоры поселочы нуазыны доны æмæ канализацийы хæххытæ уадзыны куыстыты фылдæр хай фесты, – фехъусын кодта информагентад «Рес»-æн Ленингоры районы къухдариуæггæнæг Хацырты Филипп.
«Баззад ма нын цалдæр уынджы, фæлæ уым дæр куыстытæ æххæст цæуынц. Ацы азы райдианæй цæуынц проектон куыстытæ, цæрджыты хæдзæрттæм нуазыны дон æмæ канализаци бауадзыны фæдыл. Экспертон хатдзæгтæ проектон бæрæггæнæнтимæ цæттæ уыдзысты мартмæ», – банысан кодта Хацырты фырт.
Хæдзæрттæ зæххы бын коммуникацитæм иу куы æрцæуой, уæд æрæвналдзысты уынгты арæзтадмæ.
Районы администрацийы къухдариуæггæнæджы ныхæстæм гæсгæ, асфальт æрцæудзысты централон уынгтæ, иумæйагæй схæрзарæзт кæндзысты тротуарты, ныссадздзысты цъæхдарæнтæ.
Паддзахадон унитарон куыстуат «Водоканал»-ы сæйраг инженер Сиукъаты Иван куыд банысан кодта, афтæмæй раздæр районы инженерон хызæгтæ уадзыныл куыста æндæр подрядон организаци. Уыдон ауагътой 11 километр нуазыны доны æмæ 9 километры та канализацийы хæххытæ.
«Куыстмæ куы æрæвнæлдтам, уæд ма нын бантыст ауадзын 5 километры нуазыны доны æмæ 4 километры та канализацион хæххытæ», – загъта Сиукъаты фырт.
Паддзахадон унитарон куыстуат «Водоканал» ма Ленингоры районы аразы дон сыгъдæггæнæн арæзтæдтæ.
«Æвæрд цæуынц ифтонггæрзтæ, монтаж цæуы административон-цардуагон бæстыхай. Куыстытæ фæуыдзысты ацы аз», – фехъусын кодта Сиукъаты Иван.
Банысан кæнын хъæуы, ацы проект реализаци кæй цæуы РХИ-йы социалон-экономикон рæзтæн ахъазгæнæг Инвестицион программæмæ гæсгæ.
Comments are closed, but trackbacks and pingbacks are open.