Хуссар Ирыстоны Парламенты сессийы радон рабадты хорзыл банымадтой Парламенты æвдæм æрсидты депутатон æвзæрстытæ ауадзыны тыххæй иумандатон æвзарæн зылдты схемæтæ сфидар кæныны тыххæй закъоны проект.
Закъоны проектмæ гæсгæ республикæйы территорийыл уыдзæн 17 иумандатон æвзарæн зылды. Уыдонæй фараст уыдзæн горæт Цхинвалы территорийыл æмæ дыгæйттæ та – республикæйы административон-территориалон иуæгты.
Закъондæттынад, закъондзинад æмæ бынæттон хæдразамынады фæдыл комитеты сæргълæууæг Диакъонты Амираны ныхæстæм гæсгæ, сессийы цы закъоны проект хаст æрцыд, уый фæдыл уагъд æрцыд комитеты рабадт.
Парламентари хъусдард аздæхта иуæй-иу зылдты æвзарджыты нымæцмæ. Аивгъуыйгæ æвзæрстытимæ абаргæйæ, ныртæккæ сæ нымæц у къаддæр.
ЦÆК-ы минæвар Бестауты Тамаз куыд банысан кодта, афтæмæй, уыцы бæрæггæнæнтæ бындуриуæг кæнынц районты сæргълæуджыты информацийыл.
Хатырон кредитты тыххæй
2023 азы Хуссар Ирыстоны чысыл æмæ астæуккаг амалиуæгадæн хатырон кредиткæнынадæн ахъаз кæныны фонды бюджет сæххæст кæныны тыххæй закъон депутаттæ банымадтой хорзыл.
Экономикæ, чысыл амалиуæгад æмæ хъæууон хæдзарады фæдыл комитеты сæрдар Тъехты Алан банысан кодта, зæгъгæ, 2023 азы фонды æвджидарты совет хорзыл банымадта 71 бизнес-проекты.
Хъæууон хæдзарады фадыджы, йæ ныхæстæм гæсгæ, лæвæрд æрцыд 45 кредиты, лæггæдты фадыджы – 14, арæзтады фадыджы – 8, туризмы фадыджы – 3, базарады фадыджы – 1.
«2023 азы Фонды бюджеты æфтиæгты иумæйаг гуырахст плангонд суммæйæ уыд 49 542, 84 сомы. Фонды хæрдзты иумæйаг гуырахст та плангонд суммæйæ уыд 7 850, 58 мин сомы», – загъта Тъехты Алан.
Закъоны проект ист æрцыд æмхъæлæсæй.
Информацион агентад «Рес»,
Sputnik-æй ист къам
