Дзыллон информацийы фæрæзты куыст вазыгджын процесс у. Куы йæ зониккат, цас адæймаджы куыстæй равзæры газеты иу номыр. Алы хатт ууыл дзурын нæ ‘мбæлы, фæлæ нæ профессионалон бæрæгбон куы вæййы, уæд куысты сусæгдзинæдтæ, редакцийы мидгуыст, газет куыд арæзт цæуы, кæй фæрцы, уыдæттæ раргом кæнын æмбæлы.
«Æнусы дæргъы «Хурзæрин»-æн бирæ хорз редактортæ уыд. Сæ нæмттæ иууылдæр зындгонд сты. Алчидæр сæ йæ хайбавæрд бахаста газеты куыстмæ, йæ размæцыдмæ. Алкæцы редактор дæр хицæн кодта иннæмæй, фæлæ иууылдæр архайдтой, ирон дзырд алы ирон хæдзармæ хæццæ кæныныл.
Абон газеты редактор у зынгæ журналист, ХИПУ-йы хистæр ахуыргæнæг Дамбегты Иринæ Алиханы чызг. Æртыккаг аз кусы ацы бынаты æмæ ныридæгæн хорз æмвæзадыл куыст равдыста. Уый бæрæг у газеткæсæджы хатдзæгтæй – махæн та нæ куыст уыдоны тыххæй у æмæ нын ахæм аргъ куы скæнынц, уæд ноджы зæрдиагдæрæй бавналæм нæ куыстмæ.
Къуыри æртæ хатты цæуы газет æмæ йæ цæуæн бон райсомæй суанг изæрмæ мах иузæрдионæй куысты æнæхъæнæй аныгъуылæм.
Бирæ азты нæм сæйраг редакторы хæдивæгæй (уыд газеты редактор дæр) кусы РХИ-йы сгуыхт журналист Биазырты Роланд. Йæ фæрцы газетæн бирæ хорз æнтыстытæ æфты йæ къухы. Йæ фæлтæрддзинад, йæ амындтытæ журналисттæн стыр æххуысаг сты. Цыфæнды лæмæгъ æрмæгæй дæр Роланд саразы æнтыстджын.
Хицæн ныхасы аккаг сты бæрнон секретарь Дзебысаты Гуло æмæ йæ хæдивджытæ Гуыцмæзты Евелинæ æмæ Æлборты Агуындæ.
Хицæн куыст кæнынц газеты цыппар хайады кусæг журналисттæ. Актуалон темæтыл, куыд хуыздæр бакусой, респонденттæм цы фарстатæ радтой, уыдон уацхæсджытимæ равзарынц хайады сæргълæуджытæ. Хайады сæргълæуджытæ се ‘ппæт дæр дæсны кусджытæ сты – Осиаты Индирæ, Цхуырбаты Ларисæ, Джиоты Екатеринæ æмæ Бестауты Валя. Уыдон хорз зонынц сæ уацхæсджытимæ ныхас кæнын. Хайадты риссаг кæнæ лыгкæнинаг фарст куы сæвзæры, уæд аныхас кæнынц газеты редакторимæ, ба-цархайынц, иумæйаг тыхтæй йæ аскъуыддзаг кæныныл.
Редакцийы кусынц фæлтæрд журналисттæ, куыд, зæгъæм, Хуыбиаты Никъала æмæ Гæззаты Иван. Кæцыфæнды темæ дæр афтæ равзардзысты, афтæ йыл ныффысдзысты æмæ æнæмæнг газеткæсæджы зæрдæмæ фæцæудзæн. Ис нæм æрыгон журналисттæ дæр. Хистæртæ сын æнæвгъауæй сæ зонындзинæдтæ амонынц, цæмæй сæ дæсныйадыл хуыздæр фæхæст уой æмæ йыл æнувыд уой. Уыцы журналисттæм хауынц Кокайты Зæринæ – йæ уацтæ арæх вæййынц газеты. Цыбырты Анжелæйæн ис хорз перспективæтæ: ныртæккæ кусы тæлмацгæнæгæй, фæлæ уацтæ дæр арæх афыссы. Рæстæгæй-рæстæгмæ нæм практикæйы вæййынц ХИПУ-йы журналистикæйы факультеты студенттæ дæр, уыдон æрмæджытæ дæр ныммыхуыр кæнæм нæ газеты.
Ис нæм, дунейы политикон цаутæм йæ хъус чи дары æмæ сын стæй аккаг афæлгæст анализ чи скæны, ахæм журналист дæр – Джиоты Алыксандр. Йæ фæрцы нæ газеткæсæг зонгæ кæны дунеон хабæрттимæ. Йæ аналитикон зондахаст ын фадат дæтты ахсджиаг æрмæджытæ цæттæ кæнынæн.
Газеткæсæг фæрстыл арæх фæрсы Осиаты Индирæ, Къæбулты Маринæ æмæ Танделаты Виленæйы æрмæджытæ. Республикæйы цæуæг политикон цаутæм дарынц сæ хъус æмæ сæ рæгъмæ рахæссынц.
Æнтыстджынæй архайы сæрмагонд æфсæддон операцийы, Стыр Фыдыбæстæйон хæсты æмæ гуырдзиаг-ирон хъаугъаты фæмардуæвджыты нæмттæ сæнусон кæныныл Джиоты Екатеринæ. Архайы алкæй кой дæр ракæныныл, сæ цыбыр царды цы фæндæгтыл рацыдысты, цы хъайтардзинад равдыстой, уыдон газеткæсджыты размæ хæссыныл.
Цхуырбаты Ларисæйы æрмæджытæ дæр тынг фидауын кæнынц газеты фæрстæ. Цыдæриддæр культурæйы, нæ фæсивæды царды цæуы, уыдон цымыдисонæй равдисы. Рох æй нæ вæййынц Цæгат Ирыстоны культурæйы зынгæдæр цаутæ. Ис ын хи хъуыдыкæнынад, ис ын хи æрмдзæф.
Йæ курдиатæй зындгонд у Бестауты Валя. Уый канд газетæй нæ, фæлæ ма йæ зонынц Паддзахадон телеуынынадæй дæр. Валя æнгом баст у хуымæтæг адæмимæ! Йæ телеалæвæрдтæ, йæ уацтæ сты хъæууон адæймаджы цинтæ æмæ рыстытимæ, сæ проблемæтыл баст. Сæ кой кæнынæй не ‘фсæды! Йæ рис – хъæутæ æдзæрæг кæй кæнынц. Йæ зæрдæмæхъаргæ æрмæджытæ тынг фидауын кæнынц «Хурзæрин»-ы. Æмткæй райсгæйæ, Валя дæ фыстытæ алы адæймаджы зæрдæмæ дæр фæндаг ссарынц.
Кæй зæгъын æй хъæуы, хицæн ныхасы аккаг сты нæ газеты техникон кусджытæ (верстгæнджытæ) Дриаты Лейла æмæ Уалыты Мальвинæ, æвзарæг Уалыты Алисæ. Сæ сæртыл хæрдмæ дæр не схæцынц, афтæмæй фæкусынц. Архайынц газеты фæрсты рæсугъддзинадыл. Уырны нæ, ногдæр фæлтæры компьютертæ сæ къухты куы бафтиккой, уæд сæ куыст зынгæ аивдæр суаид!
Фæстагмæ газеты фæрстыл фæкусынц корректортæ – Хуыгаты Миленæ, Джиоты Фатимæ æмæ Лалыты Ленæ. Ацы æртæ сылгоймагæй алчи дæр йе стыр бæрндзинад æнкъары. Ныры дуджы нæй цæрæн æнæ интернетæй. Газет «Хурзæрин»-æн дæр Телеграм каналы ис йæхи сайт. Телеграм канал чи кусы, уыдонæй сæ иу у Тъехты Аллæ.
Иууылдæр кусæм дзырдимæ, хъуыдыйæдтимæ, тексттимæ, фæлæ не ‘хсæн ис нымæцонтимæ кусæг дæр нæ бухгалтер Хуыгаты Маринæ. Газеткæсæг дын дæ куыст нæ уыны, фæлæ мах хорз банкъарæм Маринæйы куыст мæйы райдианы, мызд куы райсæм. Æрвылмæй дæр не скаст дæумæ у, Маринæ, æмæ дæ нымæцты бирæ бæркад уæд!
Мæ зынаргъ коллегæтæ! Арфæ уын кæнын нæ профессионалон бæрæгбоны цытæн! Нæ газет бонæй-бон мидисджындæр цы кæна. Цыфæнды зындзинæдтыл дæр куыд уæлахиз кæнæм! Алкæмæн дæр уæ йæ царды мидис æмæ нысанмæ цæуыны тых куыд уа, ахæм амонд уæ уæд.
УАЗÆГТЫ Марфа
