8-æм март у уалдзæджы иууыл рæсугъддæр бæрæгбон. Дунейы нысан цæуы, уалдзыгон фыццаг дидинæгау чи райхæлы, адæймаджы царды ахсджиагдæр бынат чи ахсы, уыцы сылгоймæгты бæрæгбон. Сылгоймæгтæ ацы бон райсынц иууыл рæсугъддæр арфæтæ æмæ фæндиæгтæ. Абон махæн фадат ис раарфæ кæнын Тыбылты Алыксандры номыл паддзахадон университеты журналистикæ æмæ ирон æвзаг æмæ литературæйы факультетты сылгоймæгтæн. Ацы факультеты кусынц сæ зонындзинæдтæ æнæвгъауæй фæсивæдæн дихгæнæг сылгоймæгтæ.
Битарти Зойæ Александры чызджы сæргълæудæй (1998-2008 азмæ) факультет æххæстбæрцæй слæууыд йæ къахыл. Битароны организаторон æвзыгъддзинад æмæ гоймагон миниуджыты фæрцы журналистикæйы факультет цыбыр æмгъуыдмæ ссис ХИПУ-йы тыхджын æмæ хъæугæдæр факультеттæй сæ иу.
Хъодалаты Хансиат Герсаны чызг у журналистикæйы кафедрæйы гæс, хистæр ахуыргæнæг, доцент, иумæйаг университетон газет «ХИПУ-пресс»-ы редактор, журнал «Русское слово в Южной Осетии»-йы сæйраг редактор, Хетæгкаты Къостайы номыл Паддзахадон премийы лауреат, РХИ-йы сгуыхт журналист.
Джиоты Аллæ Алексейы чызг – хистæр ахуыргæнæг, ректоры æххуысгæнæг дзыллон информацийы фæрæзтимæ кусыны фæдыл, ХИПУ-йы медиахолдинджы къухдариуæггæнæг, РХИ-йы Парламенты депутат, РХИ-йы сгуыхт журналист.
Челехсаты Иринæ Зелимы чызг – хистæр ахуыргæнæг, Паддзахадон радиоканал «ИР»-ы информацион программæты æмæ «Райсомы эфир»-ы амонæг.
Дамбегти Иринæ Алиханы чызг – журналистикæйы факультеты ахуыргæнæг, газет «Хурзæрин»-ы сæйраг редактор.
Журналистикæйы факультеты ма иузæрдион куыст кæнынц йæ рауагъдонтæ Яновская Гана, Гатыгкоты Валентинæ, Хъæцмæзты Зæринæ, Мамиты Бэлæ æмæ Хъоцыты Аленæ. Æрвылбон дæр куыстмæ æрбацæугæйæ ацы коллективы уындæй алчидæр фæисы æвæрццаг эмоцитæ.
Ирыстон æмæ ирон æвзаджы размæцыдæн егъау лæггад кæны æмæ бакодта ирон æвзаг æмæ литературæйы факультеты коллектив.
Ацы кафедрæйы дæр Битарты Зойæ Александры чызг кусы æнтыстджынæй ныр 35 азæй фылдæр, афтæ ма у Уанеты Захары номыл Хуссар Ирыстоны зонад-иртасæн институты ахуыргонд нымæрдар.
Тыбылты Ингæ Данилы чызг – филологон зонæдты кандидат, кафедрæйы доцент, ирон филологийы факультеты декан, кусы неологизмты проблемæйыл æмæ морфологийыл. Уый у программæ «Малусæг»-ы кусæг къорды активон архайджытæй сæ иу. Сарæзта дзы 4 чиныджы. Уыцы активон æмæ хæрзгъæд куысты тыххæй хорзæхджын æрцыд хицауады ‘рдыгæй «Уæлдæр ахуыргæнæндоны Сгуыхт кусæг»-ы хуындадæй. Иумæйагæй йæ зонадон куыстыты нымæц ахызт 60-йæ.
Æлборты Эммæ Графы чызг кафедрæйы кусы цалдæр азы, фæлæ йын ис хорз æнтыстытæ. Мыхуыры йын рацыдис цалдæр чиныджы. Кæсы лекциты курс ирон æвзаджы методикæйæ, афтæ ма ирон æвзаджы практикон курсæй уадзы ахуыртæ. Ацы факультеты ма æвæллайгæ куыст чи кæны, уыдон æмрæнхъ сты Уалыты Мадинæ, Тъехты Аленæ, Козаты Джульеттæ, Цхуырбаты Мананæ æмæ æндæртæ.
Нæ зынаргъ сылгоймæгтæ, махæй дæр, куыд уæ раздæры рауагъдонтæй, айсут нæ зæрдиаг арфæтæ 8-æм марты цытæн. Уалдзæджы æрбалæудимæ уын нæ зæрдæтæ зæгъынц, цæмæй уæ куысты æппынæдзух уат æнтыстджын æмæ уын арæхдæр уа амондджын уысмтæ. Сымах нын канд зонындзинæдтæ нæ лæвар кæнут, фæлæ ма уæ хъусдард æмæ аудындзинад дæр. Æппæтзæрдæйæ нæ фæнды сымахæн æнæкæрон уарзт æмæ æнæниздзинад.
ТАНДЕЛАТЫ Виленæ
КОКАЙТЫ Зæринæ
Comments are closed, but trackbacks and pingbacks are open.