Гасситы Динæ: «Паддзахады сæргълæууæг нæ план кодта Мæскуыйы «БТК-групп»-ы къухдариуæгадимæ фембæлын»

Æрæджы «Эхо Кавказа»-йы ныммыхуыргонд информаци, зæгъгæ, РХИ-йы Президент Бибылты Анатоли 15-æм февралы тагъдыл ацыд Мæскуымæ уæрæсейаг егъаудæр холдинг «Группа компаний БТК»-йы къухдариуæгадимæ фембæлыны тыххæй, уый раст нæу, – хъусын кæны паддзахады сæргълæууæджы пресс-секретарь Гасситы Динæ.

Пресс-секретары ныхæстæм гæсгæ, Уæрæсейы столицæмæ Хуссар Ирыстоны Президенты балцы программæйы нæ уыд холдингы къухдариуæгадимæ фембæлд. Бибылты Анатоли Мæскуымæ ацыд егъаудæр энергетикон компани «Газпром»-ыл 25-азы сæххæсты сæраппонд юбилейон мадзæлтты хайад райсыны нысанæн. УФ-йы столицæмæ визиты ма хынцыд уыд Газпромы къухдариуæгадимæ æмæ статс-секретарь – Уæрæсейы Федерацийы Мидхъуыддæгты министры хæдивæг Игорь Зубовимæ кусæгон фембæлдтытæ ауадзын.

«Паддзахады сæргълæууæг Мæс-куымæ ацыд раздæр сплангонд программæмæ гæсгæ. Уый размæ Газпромы къухдариуæгадæй райста хонæн гæххæтт юбилейон мадзæлтты хайад райсыны тыххæй. Уæрæсейаг столицæйы ма Бибылты Анатолийæн кусæгон фембæлд уыд Газпромы къухдариуæгадимæ. Уы-мæй дарддæр ма, Президентæн фембæлд уыд статс-секретарь – УФ-йы Мидхъуыддæгты министры хæдивæг Игорь Зубовимæ, кæцыйы рæстæджы уыдон æруынаффæ кодтой дыууæ бæстæйы барадхъахъхъæнæг органты æмгуыста-ды перспективæтыл», – загъта Гасситы Динæ.

16-æм февралы «Эхо Кавказа»-йы сайтыл мыхуыр æрцыд æрмæг «Как поссорились президент и инвестор», зæгъгæ, цыран дзырдæуы хуссарирыстойнаг хицауад æмæ уæрæсейаг холдинг «Группа компаний БТК»-йы ‘хсæн конфликты тыххæй. Публикацимæ гæсгæ, холдингы къухдариуæгад фехъусын кодта, цыма уый фæнд кæны нæ республикæйы территорийыл кондад æруромынмæ. Уый фæдыл РХИ-йы Сæудæджерад, транспорт æмæ энергетикæйы комитеты сæрдар Бекъойты Геннади уый размæ радта комментаритæ РХИ-йы дзыллон информацийы фæрæзтæн.

Чиновникы ныхæстæм гæсгæ, холдинг нæ фæнд кæны Хуссар Ирыстоны йæ архайд æруромын. Цхинвалы компани БТК-йы генералон директор Сергей Базоевимæ фембæлды рæстæджы иу ныхас дæр нæ уыд Хуссар Ирыстонæй компанийы ацыды тыххæй. Уыдон план кæнынц кондад дарддæр рауæрæхдæр кæнын æмæ 200 ног кусæгон бынаты саразын.