Нæ республикæйы цы инвестицион проекттæ æххæст æрцыдысты, уыдо-нæй иууыл ахадгæдæр у БТК-4. Сæ уæззау, фæлæ цæсгомджын куысты руаджы йæ кусджытæ сæ бавæрд хæссынц республикæйы рæзтмæ. Ныр-тæккæ уым цы 500 адæймаджы бæрц кусы, уыдон сæ мыздæй дарынхъом сты сæ бинонты.
Фæлæ фабрикæ ныр къуырийы бæрц йæ куыст æрурæдта. Æмæ та ногæй адæмы ‘хсæн айхъуыст дам-думтæ, ома, фабрикæ хъуамæ æхгæд æрцæуа, кæннод та кусджыты нымæц фæкъаддæр уа, зæгъгæ.
Мах бацымыдис кодтам, ацы ныхæс-тæн бындур ис, æви нæ. Уый фæдыл фæдзырдтам, БТК-4 къордæн Санкт-Петербурджы цы сæйраг офис ис, уымæн йæ пресс-службæмæ.
«Холдинг «БТК групп» нæ фæнд кæны сæхгæнын хуыйæн фабрикæ БТК-4 Цхинвалы. Апрелы райдианты куыстуат сног кæндзæн йæ куыст. Ныр къуырийæ фылдæр фабрикæйы къухдариуæгады бардзырдмæ гæсгæ кусджытæ æрвыст æрцыдысты улæфты. Уымæн йæ аххосаг уыд, рæстæгмæ фабрикæ йæ куыст кæй æрурæдта, йæ куысты чысыл зындзинæдтæ кæй фæзынд, уый», – зæгъы БТК-4-ы пресс-службæ.
Ацы фарстыл дзырд цыд ивгъуыд къуыри Парламенты сессийы дæр. Депутат Чилæхсаты Владимир дзырдта, зæгъгæ, ам цы хуыйджытæ куыстой, уыдон катайдзинад æвдисынц, мыййаг, куыстуат æхгæд куы æрцæуа. Парламенты Сæрдар Гасситы Петр уыцы фарсты тыххæй фехъусын кодта, зæгъгæ, БТК-4-æн уыд проблемæ, арæны сæрты хизгæйæ, йæ продукци ласыны хъуыддаджы. Президент Бибылты Анатоли æмæ хицауады æххуысæй проблемæ иуварс æрцыд. Ныр фабрикæ хъуамæ йæ куыст адарддæр кæна апрелы райдианæй. Парламенты Сæрдар ма загъта, республикæйы къухдариуæгад æппæт дæр кæй аразы, цæмæй куыстуат ноджы рауæрæхдæр уа æмæ республикæйы фæзына ноджы фылдæр кусæн бынæттæ.
УАЗÆГТЫ Марфа
Comments are closed, but trackbacks and pingbacks are open.