Горæт Къуайсамæ фæстаг дзæнгæрæджы мадзалмæ фæуазæг сты Президент Гаглойты Алан æмæ ахуырады министр Лолаты Аслан. Нæртон «Симд»-æй райдыдта бæрæгбонон цытджын линейкæ.
Зæрдиаг арфæты фæстæ бæстæйы сæргълæууæг бахатыд Къуайсайы скъолайы рауагъдонтæм: «Рухс фидæны дуæрттæ уæ размæ байгом сты… Размæ кæсут, размæ цæут æмæ дунейæн уæхи базонын кæнут уæ зонд, уæ тых æмæ æнтыстытæй. Зонындзинæдтæм тырнут кæддæриддæр… Кæмфæнды ма уат, уæ Райгуырæн бæстæйæн, уæ ныййарджытæ æмæ ахуыргæнджытæн кадгæнæг ут. Уæ номæй æз арфæ кæнын Хуссар Ирыстоны рауагъдонтæн се ‘ппæтæн дæр».
Ахуырады æмæ зонады министр дæр сын раарфæ кодта æмæ загъта: «Уæ цард æхцон æмæ райдзаст уæд, уæ бæллицтæ уæ къухты бафтæнт».
Хъæлдзæг æмæ райдзаст уыдысты уыцы бон зæрдæтæ. Рауагъдонтæ сæхæдæг æмæ райдиан кълæсты ахуыргæнинæгтæ зарыдысты ирон зарджытæ, кастысты æмдзæвгæтæ. Кæронбæттæны та рауагъдонтæ «зонындзинады дæгъæл» радтой ацы азы 10-æм къласы ахуыргæнинæгтæн.
Банысан ма кæндзыстæм, уыцы бон фæстаг дзæнгæрæг кæй ныззæлланг кодта Республикæ Хуссар Ирыстоны 561 рауагъдонæн.
